BASABASA

Tingting Minggu XV Dung Trinitatis, 20 September 2009

Na di ari Senin, 14 September 2009 dibasabasahon Tuhanta do sada dakdanak baoa di keluarga ni Amanta Pdt.Zending Sinurat, inanta i Isdawati br. Butarbutar. Hipas do dakdanak i dohot natorasna. Sai anggiat ma gabe dakdanak na hasea i ditongatonga ni keluarga lumobi di adopan ni Tuhanta.

Songon i ma soara ni tingting di kebaktian minggu nantoari 20 September 2009 di HKBP Salembaran. Nunga mansai torop nian na pasahathon hata selamat ala parsorang ni dakdanak i; angka tondong, aleale, dongan saulaon tahe. Adong ma i na pasahathon marhite sms, telephon, facebook dohot na langsung manjalang. Marragam nang sungkunsungkun : hipas do dakdanak i? bolon do dakdanak i? sehat do halak inang? dla. Las situtu roha molo torop angka dongan na manghaholongi dohot na parduli tu hita. Las ni rohanta i gabe las ni roha nasida (bd.Rom 12,15).

Marhite pengalaman i gabe tardophon roha do iba. Torop dope ruas/halak na manghirim asa diparrohahon, ala ni las ni roha manang arsak ni roha pe i. Jala jujur do iba mandok godang do kesempatan i marsalpuan boti. Angka basabasa ni Debata ndang holan ala sorang dakdanak, na mar-ulangtaon pe basabasa do i, lulus ujian, dapot parkarejoan, naik pangkat, dla.
Molo las roha dipardulihon dongan, nda patut ma hita mambahen las ni roha ni dongan? Saluhut na pinangido ni rohamu, sibahenon ni halak tu hamu, i ma bahen hamu tu nasida, ai i do pamusatan ni patik ro di hata ni angka panurirang (Mat.7:12). Mansai lambok do hata ni Jesus i begeon, ndang holan begeon ulahononhon pe ra sabas do :)

Mauliate ma di angka dongan na pasahathon hata selamat tu hami, ala basabasa ni Debata na hujalo hami. Nda tung pautanghononku Tuhan i mandok "Sian tuhanta ma jalo hamu balos ni i". Alai sian nasa tolaphu bahenonku ma songon na binahenmuna i : mandok gumodang hata selamat tu angka na mandapot basabasa na sian Tuhanta; i ma dalanku mandok mauliate tu Debata dohot tu angka donganku sudena.

zending sinurat