DIBAGASAN GOAR NI JESUS

1. Kolose 3:17

Jala na siulaon, manang di hata, manang di pambahenan, saluhutna i ma marhitehite Goar ni Tuhan Jesus, huhut mandok mauliate tu Debata Ama marhitehite Ibana.

HATORANGAN:

Torop dope halak (Kristen) na alergi madok di sude ulaon, manang hata manang pambahenan pe tongtong dipungka marhite hata “dibagasan goar ni Jesus”. Isarana di tingki mangula di hauma tadok mamuhai,“dibagasan goar ni Jesus!” Mintor didok do hita na tonditondion molo sai jotjot tadokkon i di ganup aha pe na taulahon. Somal tadok ‘dibagasan Goar ni Jesus’ holan di tingki mamuhai kebaktian dohot di tingki martangiang do. Alai molo di ngolu siapari mansai bangkol dope hita manoarahon i.

Marhite turpuk sadari on, disoarahon Ap. Paulus do tu hita : Jala na siulaon, manang di hata, manang di pambahenan, saluhutna i ma marhitehite Goar ni Tuhan Jesus, huhut mandok mauliate tu Debata Ama marhitehite Ibana (ay.17). Molo tapamanat ayat na di jolona, dipabotohon Ap. Paulus do sasintongna songon dia karakter ni halak Kristen i ma na ingkon patuduhon parange ni Debata di ngolunta. Aha do karakter ni Kristus sihangoluhononta? Karakter ni Kristus sihangoluhononta i ma parasirohaon, habasaron, haserepon, lambok dohot lambas ni roha, masipauneunean jala masisesaan dosa, haholongon ni roha, dame ni Kristus (ay.12-15).

Nunga adong teladan di hita, holan praktekna nama na ringkot. Saluhutna i taulahon holan marhitehite goar ni Tuhan Jesus, ndada marhite goar na asing. Isarana : marhitehite hamaloonta, hapistaranta, hasangaponta, hagogoonta, dla. Alai tangkas do holan dibagasan sada goar, i ma goar ni Jesus hita mangulahon saluhut angka na denggan ondeng na di paboa di ginjang i. Antong unang ma pola alergi hita mandok nasa siulaon, manang di hata manang di pambahenan tongtong “dibagasan goar ni Jesus!”. Alani, “dibagasan goar ni Jesus, sai dipatau ma hita mangulahon lomo ni rohaNa!” Amen!

PARMIANAN NI DEBATA

1. Epesus 2 : 22

Di bagasan Ibana do nang hamu rap dipauliuli, gabe parmianan ni Debata di bagasan Tondi i.

HATORANGAN:

Di partingkian na maju nuaeng on, torop do jolma na paulihon jabuna huhut mambahen tembok pemisah tu angka na di hombar balokna. On ma ngolu na sai lomo rohana holip (tertutup-eksklusif) sian angka donganna. Gabe adong ma batas pemisah di ngolu ni jolma i. Ala ni kasta gabe ndang boi marsaor na sangap tu na lea, na mora tu na pogos. Songon i do nang di huria i sandiri, olo do ala ni aturan organisasi gabe eksklusif huria i (alai mauliate ma di hurianta HKBP naung mambahen dirina inklusif).

Laos i do nang soara ni turpuk sadari on tu hita, dipaingot Ap. Paulus do halak Jahudi naung gabe Kristen na adong di Epesus asa unang dirimpu rohana lobi istimewa nasida sian halak Kristen na sian hasipelebeguon. Gabe manghorhon tu ginjang ni roha i dibahen, hape dos do di Debata saluhut jolma, manang sian bangso/etnis dia pe i. On ma goarna haluaon na universal, jala dapot ma i di bagasan Jesus Kristus na paojak huriana di portibi on. Dibagasan Jesus Kristus nunga dipadomu halak Jahudi dohot naso Jahudi, ndang mardia imbar di adopan ni Debata (Bd.Gal.3:28), asal ma porsea di Jesus Kristus nunga sahat be haluaon i.

Huria i do pamatang ni Kristus. Huria i ndada bangunanna, alai parsaoranna i do. Dibagasan pamatang ni Kristus do boi martomu angka parasingan ni jolma. Di bagasan huria i ndang adong diskriminasi, dijangkon do sude. Dibagasan Kristus ndang adong tembok/dinding pemisah di parsaoran ni angka na porsea i. Di bagasan Ibana do nang hamu rap dipauliuli, gabe parmianan ni Debata di bagasan Tondi I (ay.22). Antong taboto ma, huriaNa i do parmianan ni Debata di tano on, jala huriaNa i ma pamatangta, disi do mian Debata dibagasan TondiNa. Amen!

PALOAS MA IBANA PATUPAHON

1. Jesaya 41:4

Tung ise ma patupahon angka i dohot mambahensa? Ibana manjou angka sundut sian mulamula: Ahu Jahowa * na parjolo, jala laos ahu dope rap dohot angka parpudi.

HATORANGAN:

Ragam pambahenan naso dapot roha ni jolma dipatupa Debata laho paluahon bangsoNa. Dung pitupulu taon tartaban halak Juda di Babel (ala ni dosanasida), dung i ala ni asi ni roha ni Debata, dipasahat ma tu nasida haluaon i. Alai sian naso dapot roha ni jolma, gabe hagogoon ni bangso parbegu (Persia) do dipangke Debata laho paluahon bangsoNa, mamboan nasida mulak tu Jerusalem (bdk.Esra 2:1-2).

Halongangan do angka pambahenan ni Jahowa. Sian sundut tu sundut.do dipatupa haluaon tu bangsoNa dohot tu saluhut bangso na hinaholonganNa. Jala dipatupa pe i na marningot holongNa na manongtong i do (Jer.31:3). Hata na mandok, “Ahu Jahowa * na parjolo, jala laos ahu dope rap dohot angka parpudi”, i ma hata (pernyataan) na laho pabotohon tu hita, ia Debata na manongtong do Ibana (Pangk.1:8), jala songon i do nang holongaNa naso hadodoan i. Dipalua pe na jolo halak Juda sian tangan ni halak Babel, ala na marbalik do nasida (Juda) sian angka hajahatonnasida, dung hona uhum. Lapatanna disi, asing ni parholong roha Debata, panguhum do Ibana tu angka pardosa. Alai tutu gomodang ma holongNa manghuphupi angka hajahaton ni jolma i.

Ala ni tarimangi ma di rohanta, holong ni Debata do halongangan na umbalga di ngolunta. Jala sian naso dapot roha ni hita jolma do dipatuduhon holong ni rohaNa laho paluahon hita. Ise ma jolma na boi mangantusi cara ni Debata, na gabe jolma Ibana dibagasan Jesus Kristus laho mamboan haluaon di hita? Ndang dapot rohanta i, ia so Debata patupahon dohot pabotohon i tu hita.

Jala mangula do Debata sahat tu nuaeng di ngolum. Songon dia pe na masa di ngolunta, tuk do holong ni Debata manghosing parsorion ni ngolunta gabe tu ngolu na dumenggan, songon na pinatupa ni Debata tu halak Juda i. Jala unang sungkun boha cara ni Debata patupahon i. Paloas ma Ibana patupahon. Amen!
(Almanak, 18 Okt.11)

HOLONG SITOLU SUHI

1 Johannes 4 : 19-20

Marroha holong ma hita, ala Ibana jumolo mangkaholongi hita! Pargabus do halak na mandok: Holong rohana di Debata; hape dihosomi do donganna. Ai na so mangkaholongi donganna na niidana, tung songon dia ma haholonganna Debata na so niidana?

HATORANGAN:

Adong do sada bait ni ende ni Sikola Minggu mandok songon on : “…Yesus Cinta ‘ku, ‘ku cinta kau, kau cinta Dia…”. Ende i paingothon hita taringot tu parsaoranta tu Jesus dohot tu dongan jolma. Parsaoran i niihotan ni holong. Parjolo ingkon tangkas do tahilala na dihaholongi Jesus do hita (objek ni holong), dung i hita ma muse manghaholongi donganta (subjek ni holong). Laos terbentuk ma hubungan holong sitolu suhi (cinta segitiga).

Bona ni holong (agave) i marharoroan sian Debata, i do didok si Johanes di turpuk on. Holong maradophon Debata dohot dongan jolma, i ma parsaoran naso boi otapon (ay.7,11,20,21). Songon na nidok ni sahalak na porsea :

“Energi Kasih memecahkan dirinya sendiri sepanjang garis yang membentuk segitiga, yang pokok-pokoknya adalah Allah, diri sendiri dan sesama manusia”.

Molo dung dihaholongi Debata hita gabe tarihot ma nang dirinta manghaholongi dongan jolma. I do umbahen na gabe tanggung jawab ni halak Kristen do manghaholongi dongan jolma. Ndang boi tulakon. Nunga gabe keharusan i di ngolunta. Udutna muse ingkon dihalojahon do manghaholongi dongan, bahkan molo porlu ingkon olo berkorban. Ndada sae holan di hata, alai marhite pambahenan ingkon patuduhononhon. I do bukti ni na manghaholongi Debata, molo dihaholongi donganna jolma.

Sotung do tardapot hita gabe pargabus. Ai ama ni nasa pargabus i ma sibolis. Na mandok dihaholongi Debata alai dihosomi donganna. Hata na koras sian si Johannes do on paingothon huriaNa nang hita pe. Ai na so mangkaholongi donganna na niidana, tung songon dia ma haholonganna Debata na so niidana? Antong nunga jumolo ho dihaholongi Debata, halaputi jala halojahon ma manghaholongi donganmu. Debata, ho dohot ahu masihaholongan, on ma goarna holong sitolu suhi. Amen!

MARPARANGE DIBAGASAN TUHAN I

Kolose 2:7 Gabe marurat jala pinauliuli ma hamu di bagasan Ibana, togu marhaporseaon, hombar tu na niajarhon tu hamuna; lumobi ma hamu marroha mauliate!

Hatorangan :
Tongon do tema Jubileum 150 taon HKBP turpuk sadari on : Gabe marurat jala pinauliuli ma hamu dibagasan Ibana (Kolose 2 : 7a). Huria na polin jala sintong i ma huria na marhuaso manulak angka poda haliluon na manegai dasor ni haposseaonta tu Jesus Kristus. Mansai torop nuaeng angka parpoda haliluon marhite hata na uli na patabotabo parbinegean, alai maralo tu hata ni Debata. I do umbahen na disosoi Ap. Paulus huria (Kolose) asa rap marsitutu nasida manghamonanghon (memperjuangkan) hasintongan dibagasan haporseaon taringot tu Kristus (ay.3-5). Mardongan hagogoon ni Debata dohot haporseaon di bagasan Kristus, dihirim Apostel i do ndang adong sian huria i na manimbil sian Kristus.

Dipaingot turpuk sadari on do hita na mansai torop dope hape halak Kristen naung manjalo Jesus gabe Sipalua, alai parangena sai tongtong dope mangihuthon lomo ni rohana sandiri. Jala angka halak sisongon i do na mura ditait manang dililuhon angka parpoda haliluon. Ala ni ringkot di hita :

1. Mangolu di bagasan Kristus. Sude panggulmitan ni ngolunta, tabahen dibagasan Ibana; marparange di bagasan Ibana. Saluhut na porsea patut ingkon mian jala mangolu di bagasan Kristus. Manang aha pe na sinagkapan dohot ulaonta tongtong ma di bagasan Kristus.

2. Marurat dibagasan Ibana. Gombaran na pinangke ni Ap.Paulus i ma songon hau na togu uratna jala na mambuat sipanganonna sian i. Songon i do nang angka na porsea i ingkon marurat di bagasan Kristus. Ai Kristus do sumber hangoluanta jala dibagasan Ibana do hita dapotan hagogoon

3. Pinauliuli dibagasan Ibana. Gombaran na asing muse dipatudos tu ojahan ni bangunan na togu asa unang mura marongso ala ni habahaba. Suman tusi do ngolunta molo dibagasan Kristus ojahanta dipauliuli, gabe margogo hita mangadopi angka sumbia ni portibi on.

Siulahononhon : peop ma dibagasan roham, marurat jala pinauliuli ma ho tongtong dibagasan Kristus. Dung i parangehon ma godang angka na denggan. Amen!

3.