LUPA DIRI



5 Musa 8 : 12+14

Asa unang ia dung mangan ho jala bosuran, jala dipauli ho angka bagas na uli diingani ho. Hape lam dipaginjang ho roham jala lupa ho di Jahowa Debatam, na manogihon ho ruar sian tano Misir, sian bagas parhatobanan.

Sai adong do halak na sai padomuhon haporseaon tu hamoraon. Molo dung porsea godang ma pasupasu jala patut ingkon mamora, jala molo marpogos do berarti pardosa ma i. On ma goarna teologia sukses, haporseaon i diukur sian godang ni materi manang hamoraon na nidapotna. Sude do jolma naeng maduma, makmur ngoluna di tano on, alai ndada i na gabe tolok ukur ni halak na porsea. Nda godang do masa taida halak naung menikmati kemakmuran gabe tarboan tu sada sistim na mambahen nasida gabe madabu tu ginjang ni roha? Dipaholang dirina sian ngolu habadiaon. Justru hamoraonna i gabe bura tu dirina?  Isara : i ma na masa tu angka koruptor.

Sai dipaingot do halak Israel asa sai tongtong marsigantung nasida tu  Debata. I do dalanna asa sai tarpasupasu ngolunasida, lumobi molo dung sahat nasida tu tano na pinarbagabaga ni Debata. Ingkon tangkas do botoonnasida naso jadi marhaposan nasida tu hagogoon na asing manjalahi hangoluan, alai holan Debata do na tuk manarihon nasida di pardagingon nang di partondion pe.

Dipaingot Debata ma nasida marhite si Musa asa unang lupa diri nasida molo dung bongot tu tano na pinarbaga i. Molo hasea sude angka naniulanasida, sinur na pinahannasida jala makmur situtu nasida di tano situjuonnasida, i ma Kanaan i, sotung gabe so diingot nasida masa ni hapariron saleleng di parhorsihan. Laos lupa nasida nang di Debata. Ingkon ingoton nasida do naso boi mangolu nasida ia soala ni Debata. Ia so  i mate ma nasida jala taruhum.

Na jotjot mambahen hita lupa di Tuhan i ma uju di zona aman ngolunta. Ndang adong ancaman, tantangan manang hamaolon. Uju godang tajalo pasupasu marhite angka materi manang hamoraon. Sai hasea sude na taula, sukses jala berhasil ala tarajumi sian gogo dohot kerja kerasta. Ujungna lupa ma di Tuhan. Lupa kacang akan kulitnya. Gabe madabu tu ginjang ni roha. On ma sada bahaya (mara) na ingkon jamothononta asa unang gabe holang hita sian Debata. Ingkon tongtong do marsihohot hita mangasahon Tuhan i, ndada holan di tingki hagogotan dohot ma di tingki sukses, ai sian Ibana do saluhutna tajalo. Amen

MAMODAHAN NA DENGGAN

2 Timoteus 2 : 24

Na so patut parbadabada anggo naposo ni Tuhan i, alai tama basar maradophon saluhut, malo mangajari, benget manaon na jat;

Ndang adong gunana mangalusi manang menanggapi angka hata naso marguna. Tumagon do pinahohom. Di ngolu on jotjotan do ruar angka hata ni halak na paburukburukhon sian hata na laho pauliulihon. Hatana do mandok mengkritik alai anggo rohana laho mandabuhon. Ai molo nitanggapan angka hata bada manang perdebatan naso marguna gabe tu parbadabadaon do ujungna. Alani memang ingkon bisuk do angka na porsea maralus dohot menanggapi angka hata, lumobi na bersifat menyerang hita secara pribadi.

Songon i do ditonahon Apostel Paulus tu si Timoteus na di turpuk on. Songon parhobas ibana di huria ni Tuhan i ingkon parbadiaanna dirina marhite na manadingkon angka naso gabeak, na maralo tu habadiaon ni Debata. Jala ingkon gogoanna mangalului kualitas hidup songon na targoar ibana na pinillit ni Debata (manusia Allah). Songon uluan ni huria ibana dipaingot Apostel i do asa dipaholang dirina sian angka parbadabadaan manang digoari ma i “perdebatan-perdebatan yang tidak berpendidikan dan tidak berguna”. Ai molo parbadabada guluton nii do naso marguna.

Sandok ingkon mampu si Timoteus patuduhon sikap na lambok jala naso olo terlibat tu panghataion na holan mamparsoalhon naso tangkas tujuanna. Ingkon mampu mangajari dibagasan sikap na tenang (benget), patuduhon habasaron dohot hadirion na hot huhut manogihon angka naung lilu tu dalan na sintong.

Mansai tangkas do hape disoarahon hata ni Tuhan i tu hita sadari on, naso jadi parbadabada halak Kristen. Unang manggulut angka naso marguna. Unang lalap holan di perdebatan (holan hata) hape soadong pambahenan. Molo pe godang panginsahi di ngolunta on, sipata sangaja mambahen jut rohanta, sotung gabe olo hita terpancing gabe mangulahon na maralo tu habadiaon. Sandok taula na denggan, benget hita mangajari dongan jala tapangido gogo sian Tuhan asa dipatau hita mamodahon dohot mangulahon na denggan maradophon saluhut halak. Amen



JAHOWA DO NA MARMUDUHON HITA

2 Musa 13 : 21

Jala Jahowa mardalan di jolonasida, ia arian marhitehite ombun na marsijongjong manogihon nasida di dalan i, ia bornginna i marhitehite api na marsijongjong manulu nasida, asa tarbahen nasida mardalan arian dohot borngin.

Di tingki saonari, songon dia do cara ni Debata manogunogu angka na porsea di dalan sidalananna? So tarida rupa ni Debata, so boi tiopon songon paniop ni dakdanak tu natorasna.

Na jolo marhite ombun dohot api Jahowa mardalan di jolo ni bangso Israel di parhorsihan na gok parmaraan i. Didongani do tongtong nasida arian dohot borngin. Ndang dung jungada ditadingkon Ibana bangso i. Nunga porsea nasida di bagabaga tano habaoran ni susu dohot situak ni loba, ima Tano Kanaan, nuaeng di togutogu nasida asa porsea di cara ni Debata marmudumuduhon nasida saleleng di parhorsihan.

Taboto do pasang-surut ni haporseaon ni halak Israel saleleng di parhorsihan. Jotjot marungutungut, mempersalahkan Debata ala ni angka hamaolon. Marungutungut ala ni sipanganon, ala ni siinumon, dla. Alai marlambas ni roha do Debata marnida hatangkangonnasida. Sipata diuhum do nasida, alai gumodang do asi ni roha ni Debata tu nasida na mamboan haluaon tu nasida haruar sian parhatobanon Misir. Na pasti marhite tangan ni Jahowa na gogo i gabe manahan do bangso i mamolus ragam ni hamaolon saleleng di parhorsihan. Didongani do nasida arian marhite ombun, dohot borngin marhite api na marsijongjong sahat ro din a tolhas tu tano Kanaan.

Nuaeng dang be marhite ombun dohot api na marsijongjong hataridaan ni Debata mandongani hita. Ai Tondi do Debata. Marhite haporseaonta di Jesus Kristus Tuhan, didongani, diramoti do hita mandalani hangoluan on. Molo naeng panghilalahononta cara ni Debata mandongani hita ganup ari, ganup borngin, hasiholi ma hataNa. Ai hata i do sulusulu ni pat jala hatiuron di dalan si dalananta (Psalm 119:105). Amen

DI INGOT DO HO, INGOT MA IBANA!

Psalm 105 : 8 

Sai marningot do Ibana di padan binahenna ro di salelenglelengna, di hata pinatikna i marriburibu sundut.

Jotjotna i sumurut halak laho mamuji Tuhan di ngoluna. Hira nasoada sipata angka na denggan dapot di rohana di parngoluan on. Bangkol ni roha laho mamuji Tuhan ala naso rade marnida angka na denggan na ro tu ngoluna, di partingkian na salpu, nuaeng dohot na naeng ro.  Gariada tahe parungutunguton na ro molo jotjot ndang tulus angka na pinangidona.

Jotjot do digoar psalmen 105 on psalmen sejarah na marojahan tu pangajarion. Tujuanna i ma laho pabotohon huhut mangarimangi pambahenan ni Jahowa tu Israel na masa na jolo. Asa diboto nasida mandok mauliate ala ni asi ni rohaNa na godang i huhut patoguhon hasationnasida maradophon Ibana. Pujian dohot hasatiaonnasida ndada saguru di haburjuonnasida mangoloi Jahowa, alai ala na manada do nasida dipambahenanNa na tongtong patuduhon asi ni roha godang huhut satia di padanNa.

Ditogu turpuk sadari on do tu hita asa talehon roha, pingkiran dohot hadaulatonta tu Jahowa. Marhite kata kerja na sinoarahon ni parpsalmen on (1-5) ima aspek-aspek ibadah na patutu hangoluhononta : mandok mauliate ma hamu, marende ma hamu, sisiri (carilah) hamu ma, tunggulhon (bermegahlah) hamu ma, sai ingot hamu ma, dla, laho paingothon hita taringot tu angka na binahen ni Jahowa di tingki na salpu, nuaeng dohot na naeng ro. Dipatuduhon Jahowa do asi ni rohaNa na godang i sian mulana, jala ndang marna mantak i dipasahat tu hita.

Ala ni mansai tangkas do sinunggulan ni hata ni Debata tu hita tingki on asa unang be nian manjua porsea hita tu Ibana, alai tapatuduhon ma pangoloionta situtu (ndada sipaula be) huhut satia tu Ibana  parasi ni roha huhut pardenggan basa i. Tapasangap tongtong goarNa marhite hata nang pambahenanta. Amen



TONDI PANGAJARI

Johannes 16:8 

Anggo dung ro Ibana, ajaranna do portibi on taringot tu dosa dohot taringot tu hapintoron 

dohot taringot tu uhum.

==00==

Dan kalau Ia datang, Ia akan menginsafkan dunia akan dosa, kebenaran dan penghakiman

Dokdok do roha molo masa parsirangan di angka na maraleale. Pola do didok halak batak di umpasa na mandok “Manuk ni Pealangge hotekhotek laho marpira, sirang na maraleale lobian na matean ina”. Songon i ma na naeng masa di Jesus dohot angka siseanNa. Nian ndang apala diatusi angka sisean i dope angka na nidok ni Jesus i. Ido asa gabe sungkunsungkun nasida dia do astuan ni “satongkin nari?” Ala didok Jesus tu nasida : Satongkin nari nama, ndang  idaonmu be Ahu, dung i: Satongkin nari muse, idaonmuna ma Ahu. 

      Andorang so masa dope (manang nunga lam jonok) sitaonon na naeng masa tu Tuhan Jesus, dilumbahon hian do na ingkon borhat nama Ibana jala manadingkon nasida marhite “jalan salib” (via dolorosa). Jala marserak ma angka siseanNa i masitondong angka dalanna. Alai dibagabagahon do dung laho Ibana suruonNa ma Pangondian i mandongani angka siseanNa i. Pangondion nanidokNa i ma Tondi Parbadia. Tondi Parbadia  i do muse na mangajari portibi on taringot tu : (a) Dosa : sederhana do pandohan taringot tu dosa dison, i ma angka naso porsea di Jesus. Jesus do na manaluhon dosa, na paluahon sian dosa, na manesa dosa ni jolma. Manang ise naso posea di Ibana ndang di ibana haluaon, ndang sesa dosana. Ala ni dos tu na mardosa do halak molo so porsea di haluaon na binoan ni Jesus tu portibi on. (b) Hapintoron (kebenaran) : hapintoron na nidokna dison i ma na tutu do Jesus i na ro sian ginjang, na sinuru ni Ama i jala na mulak muse tu Ama i. Ndang idaon ni jolma be Ibana songon Anak ni Jolma, alai nunga rap Ibana dohot Ama i di banua ginjang. I ma hapintoron na naeng ajarhonon ni Tondi i tu portibi on. (c)  Uhum : ndang adong na tuk manguhumi angka induk ni portibi on. Ajaran ni Tondi i ma portibi on taringot tu panguhuman sogot, jala paboahon naung jumolo diuhum Ibana angka induk ni portibi on.

Tondi Parbadia do manogunogu hita laho mananda dosa, hapintoran dohot uhum ni Debata. Jala disuru do hita asa maghatindanghonsa tu portibi on. Ala ni unang ma mabiar hita, nunga monang Kristus manaluhon portibi on, jala disuru do TondiNa mandongani hita saleleng ditano on dope hita. Ndang hea be Ibana manadingkon hita, hita do na jotjot manadingkon Ibana. Alani Marsihohot jala so mubauba ma hita mangihuthon Tuhan i. Ai Tondi Pangajari do dilehon tu hita asa taboto holan Kristus do dalan tu hangoluan. Amen