PARMIANAN NI DEBATA

1. Epesus 2 : 22

Di bagasan Ibana do nang hamu rap dipauliuli, gabe parmianan ni Debata di bagasan Tondi i.

HATORANGAN:

Di partingkian na maju nuaeng on, torop do jolma na paulihon jabuna huhut mambahen tembok pemisah tu angka na di hombar balokna. On ma ngolu na sai lomo rohana holip (tertutup-eksklusif) sian angka donganna. Gabe adong ma batas pemisah di ngolu ni jolma i. Ala ni kasta gabe ndang boi marsaor na sangap tu na lea, na mora tu na pogos. Songon i do nang di huria i sandiri, olo do ala ni aturan organisasi gabe eksklusif huria i (alai mauliate ma di hurianta HKBP naung mambahen dirina inklusif).

Laos i do nang soara ni turpuk sadari on tu hita, dipaingot Ap. Paulus do halak Jahudi naung gabe Kristen na adong di Epesus asa unang dirimpu rohana lobi istimewa nasida sian halak Kristen na sian hasipelebeguon. Gabe manghorhon tu ginjang ni roha i dibahen, hape dos do di Debata saluhut jolma, manang sian bangso/etnis dia pe i. On ma goarna haluaon na universal, jala dapot ma i di bagasan Jesus Kristus na paojak huriana di portibi on. Dibagasan Jesus Kristus nunga dipadomu halak Jahudi dohot naso Jahudi, ndang mardia imbar di adopan ni Debata (Bd.Gal.3:28), asal ma porsea di Jesus Kristus nunga sahat be haluaon i.

Huria i do pamatang ni Kristus. Huria i ndada bangunanna, alai parsaoranna i do. Dibagasan pamatang ni Kristus do boi martomu angka parasingan ni jolma. Di bagasan huria i ndang adong diskriminasi, dijangkon do sude. Dibagasan Kristus ndang adong tembok/dinding pemisah di parsaoran ni angka na porsea i. Di bagasan Ibana do nang hamu rap dipauliuli, gabe parmianan ni Debata di bagasan Tondi I (ay.22). Antong taboto ma, huriaNa i do parmianan ni Debata di tano on, jala huriaNa i ma pamatangta, disi do mian Debata dibagasan TondiNa. Amen!