PALOAS MA IBANA PATUPAHON

1. Jesaya 41:4

Tung ise ma patupahon angka i dohot mambahensa? Ibana manjou angka sundut sian mulamula: Ahu Jahowa * na parjolo, jala laos ahu dope rap dohot angka parpudi.

HATORANGAN:

Ragam pambahenan naso dapot roha ni jolma dipatupa Debata laho paluahon bangsoNa. Dung pitupulu taon tartaban halak Juda di Babel (ala ni dosanasida), dung i ala ni asi ni roha ni Debata, dipasahat ma tu nasida haluaon i. Alai sian naso dapot roha ni jolma, gabe hagogoon ni bangso parbegu (Persia) do dipangke Debata laho paluahon bangsoNa, mamboan nasida mulak tu Jerusalem (bdk.Esra 2:1-2).

Halongangan do angka pambahenan ni Jahowa. Sian sundut tu sundut.do dipatupa haluaon tu bangsoNa dohot tu saluhut bangso na hinaholonganNa. Jala dipatupa pe i na marningot holongNa na manongtong i do (Jer.31:3). Hata na mandok, “Ahu Jahowa * na parjolo, jala laos ahu dope rap dohot angka parpudi”, i ma hata (pernyataan) na laho pabotohon tu hita, ia Debata na manongtong do Ibana (Pangk.1:8), jala songon i do nang holongaNa naso hadodoan i. Dipalua pe na jolo halak Juda sian tangan ni halak Babel, ala na marbalik do nasida (Juda) sian angka hajahatonnasida, dung hona uhum. Lapatanna disi, asing ni parholong roha Debata, panguhum do Ibana tu angka pardosa. Alai tutu gomodang ma holongNa manghuphupi angka hajahaton ni jolma i.

Ala ni tarimangi ma di rohanta, holong ni Debata do halongangan na umbalga di ngolunta. Jala sian naso dapot roha ni hita jolma do dipatuduhon holong ni rohaNa laho paluahon hita. Ise ma jolma na boi mangantusi cara ni Debata, na gabe jolma Ibana dibagasan Jesus Kristus laho mamboan haluaon di hita? Ndang dapot rohanta i, ia so Debata patupahon dohot pabotohon i tu hita.

Jala mangula do Debata sahat tu nuaeng di ngolum. Songon dia pe na masa di ngolunta, tuk do holong ni Debata manghosing parsorion ni ngolunta gabe tu ngolu na dumenggan, songon na pinatupa ni Debata tu halak Juda i. Jala unang sungkun boha cara ni Debata patupahon i. Paloas ma Ibana patupahon. Amen!
(Almanak, 18 Okt.11)