BEGE MA: Acara Pesta Peresmian Huria Na Gok HKBP Salembaran

PESTA PERESMIAN HURIA NA GOK DAN PEMBANGUNAN

HKBP SALEMBARAN RESORT TANGERANG KOTA

MINGGU XIX DUNG TRINITATIS

Tgl. 18 Oktober 2009

Thema :

GABE PARASI ROHA MA HAMU SONGON AMAMUNA

PARASI ROHA I (Lukas 6 : 36)

Sub Thema :

Marhite Pesta Huria Na Gok, HKBP Salembaran lam hobas pamajuhon ulaon asi ni roha (Diakonia) di tonga ni huria dohot masyarakat asa gabe pasupasu tu angka na humaliang.

I. PANGARADEON :

Ø Praeses, Pandita, Parhalado dohot Panitia Mangarade di Bilut Parhobasan.

Ø Prosesi Parhalado & Panitia, sude ruas jongjong.

Ø Ditingki Prosesi diiringi musik BE No. 585.

II. IBADAH ( L = Liturgis, H = Huria)

L : Huria ni Debata na dihaholongan ni Tuhanta Jesus Kristus, hami saluhut Parhalado, pasahathon tabe ma tu sude hamu ruas ni huria: Asi ni roha ma di hamu, jala dame na sian Tuhanta, ima na mangaramoti hita saluhutna.

H : Asi ni roha ma nang di hamu angka parhaladonami, jala dame na sian Tuhanta, i ma na mangaramoti hita saluhutna.

L : Dibagasan sadarion tung tama do hita mandok mauliate tu Debata, disaluhut pandonganion dohot pangaramotion ni Debata di sude pardalan ni ngolunta. Di ari sadarion dipaloas Debata huria-Na diojakhon gabe Huria Na Gok, i ma HKBP Salembaran. Saluhutna i tung asi ni roha ni Debata do i tu hita. Ala ni tapuji ma Tuhanta jala tasomba ma Ibana, taendehon ma “Sangap di Jahowa”

(mangendehon BE 585: “Somba ma Jahowa”)

Somba ma Jahowa Debatanta, Amen Haleluya

Sigomgom langit tano on ro di isina, Amen Haleluya

Beta hita lao marsinggang tu joloNa, Amen Haleluya

Na songkal jala nabadia do Jahowa, Amen Haleluta

Reff : Endehon Amen Haleluya, Endehon Amen Haleluya

Endehon Amen Haleluya, Endehon Amen Haleluya

L : Tung so tarasam hita do balga ni holong ni roha ni Debata, dibagasan pardalan ni ngolunta, jala tung so hasuhatan do denggan ni basaNa. Antong haholongi ma Debata sian nasa roham, sian nasa ateatem dohot sian nasa pingkiranmu. Robe ma hamu tu adopanNa jala somba ma Ibana.

J : (mangendehon BE 585: “Somba ma Jahowa”)

Pujima Jahowa Debatanta, Amen Haleluya

Parasi roha na sumurung do Ibana, Amen Haleluya

Taendehonma goar ni Debatanta, Amen Haleluya

Ala ni denggan ni basaNa na tu hita, Amen Haleluya

Reff : Endehon Amen Haleluya......

L : Pillit ma sadarion, manang na ise do sioloanmu: hagogoon portibion do manang Debata si lehon hangoluan? Pillit ma sadarion manang na ise si sombaonmu: debata sileban do manang Debata sitompa langit dohot tano.

H : Alai anggo au dohot donganhu sajabu, Debata do sioloan dohot sisombaon nami.

… jongjong …

H : (mangendehon BE 585: “Somba ma Jahowa”)

Sangap di Jahowa Debatanta, Amen Haleluya

Na bonar jala marmulia do Jahowa, Amen Haleluya

Tapatimbul ma goarni Debatanta, Amen Haleluya

Na tigor jala na sun gogo salelengna, Amen Haleluya

Reff : Endehon Amen Haleluya......

03. VOTUM – INTROITUS – DOA

L : Marhitehite goar ni Debata Ama dohot goar ni AnakNa Tuhan Jesus Kristus dohot Goar ni Tondi Parbadia na tunompa langit dohot tano on

H : Amen

L : Olophon ma Jahowa, ale sandok tano on! Oloi hamu ma Jahowa marhitehite las ni roha, ro be ma hamu tu joloNa marhitehite olop-olop.

H : Boto hamu ma on: Jahowa do Debata; Ibana jumadihon hita, jala Ibana nampuna hita, bahen bangsona dohot biru-biru pinarmahanNa.

L : Bongoti hamu ma angka bahalNa marhitehite hamauliateon, angka alamanNa marhitehite pujipujian, mauliate ma roha muna tu Ibana, puji ma goarNa. Haleluya.

H : (mangendehon) Haleluya-Haleluya-Haleluya

L : Martangiang ma hita: Ale Debata Amanami, mandok mauliate do hami tu Ho, di sude denggan ni basaM. Tung so tarasam do angka pambahenanMu, na mandongani dohot na mamasu-masu sude hami ruasMon. Sadari on dilehon Ho do las ni roha tu huriaM, HKBP Salembaran, na boi patupahon PESTA MANGOJAKHON HURIA NA GOK. Tu Ho do hami pasahathon parsombaon nami, ala sian tingki tu tingki, lam mangerbang huriaMon dohot panghobasionNa. Dilehon Ho do sada ni roha di sude ruasMu jala didongani Ho do nang angka parhalado laho marhaladoi huriaM. Antong sai saut ma harajaonMu dohot hamuliaonMu di huriaMon, dibagasan goar ni anakMu Tuhan Jesus Kristus, Sipalua hami. Amen.

— hundul —

04. Marende BE No. 743:1-2 “O Tuhan Togu-togu Ma Au”

O Tuhan togu-togu ma au, tu dalan lomo ni rohaMi

Raphon Ho sonang mardalan au, nang rahis maol sidalananki

TondiMi baen manggohi au on, margogoihon au na posoMon

Pasangap Ho di ngolungkon, paima sahat tu surgo au on

Panghulingi ma au o Tuhan, na rade tumangihon hataM

Sai tumpahi ruasMu Tuhan, na uasan nuaeng di hataM

Sai patau ma au on naposoM. Manjou halak na dao sian Ho

Ro di na so tumanda Ho, muba gabe pangoloi di Ho

05. MANJAHA PATIK

L : Tangihon hamu ma patik ni Debata i ma Patik Papituhon na mandok : Unang ho mangalangkup. Dia do lapatan ni i?

H : On do : Ingkon dihabiari rohanta Debata jala ingkon holong rohanta di Ibana, asa toman rohanta jala porman dohot pangalahonta ro di hatanta, ianggo angka naung marbagas i ingkon marsipahamaolan jala masihaholongan.

L : Antong rap mangido gogo ma hita sian Tuhan Debata!

H : Ale Tuhan Debata sai pargogo i ma hami, mangulahon na hombar tu patikmi. Amin.

06. Marende BE.No. 695 : 1-2 ”Jesus Tuhanku di Ho ma au on”

Jesus Tuhanku di Ho ma au on, asa mangihut tu Ho au tongtong.

Gohi rohangku ingani au on. Sonang di Ho tongtong.

O Tuhan togu ma au, O Tuhan togutogu ma au.

Gohi rohangku ingani au on, sonang di Ho tongtong

…jongjong…

Mansai godang do pardangolanki, tagan so Jesus dope tohaphi.

Disesa Jesus sude dosangki, gok dame rohangki.

Asi rohaNa di au. Tongtong asi rohaNa di au.

Disesa Jesus sude dosangki, gok dame rohangki.

07. PANOPOTION NI DOSA DOHOT BAGABAGA

L : Huria ni Debata na nihaholongan ni Kristus. Dibagasan unduk dohot serep ni roha, ro ma hita tu adopan ni Debata. Tatopoti ma dosanta tu Amanta Debata, jala tapangido ma hasesaan ni dosanta, dibagasan goar ni Tuhan Jesus Kristus Parasi roha i. Martangiang ma hita dibagasan rohanta be.

(… tingki na hohom… musik mangendehon BE. 683 sada ayat)

L : Ale Debata amanami na badia jala na gok asi ni roha, manang na piga hali hami ro tu adopanMu, huparhatopot hami do sude angka dosa-dosa nami na godang i. Tung mansai jotjot do hami manirpang sian dalanMu, ndang mangulahon lomo ni roham. Nuaeng ro hami tu joloM mangido asi ni rohaM: Sai sesa ma sude dosa nami jala unang paingotingot sude dosanami na godang i.

H : Ale Tuhan, asi ma rohaM di hami halak pardosa on!

L : Unang ma pabali hami sian adopanMu ale Jahowa, ala ni dosa dohot hajahaton nami. Alai marpamuati ma rohaM di hami. Huparhatopot hami do, jotjot do hami lilu songon biru-biru masitondong dalanna be. Ndang be hu ulahon hami lomo ni rohaM. Asi ma roham di hami ale Debata, jala sesa ma sude dosa nami.

H : (mangendehon BE.No. 683“DiadopanMu Jesus”)

Di adopanMu Jesus, lea tutu do diringkon

Dibaen godang ni dosangkon, diadopanMu Jesus.

L : Ale Tuhan Debata, Amanami, Parasiroha na sumurung! Na pungu do hami di joloM martangiang tu Ho. Ndada mangasahon hatigorannami, na mangasahon as ni rohaM na godang i do. Sai asi ma rohaM mida sandok bangsonami, sesa ma dosanami saluhutna. Sai sungguli ma rohanami, asa muba roha dohot pangalahonami, ala ni Tuhan Jesus Kristus Tuhannami, sipangoluhami.

H : (mangendehon BE.No. 683”DiadopanMu Jesus”)

DiadopanMu Jesus, tarsolsol bagi rohangkon

Muba ma au tu jolo on, diadopanMu Jesus

L : Huria ni Debata naung manopoti dosa, nuaeng tabege ma hata baga-baga ni Debata, taringot tu hasesaan ni dosanta: Songon on do hata ni Tuhan Jahowa: Nunga pola hupasisi angka pangalaosim songon ombun, jala songon ombun manorop angka dosam. Sai mulak ma ho tu Ahu, ai Ahu do sipalua ho. Hasangapon ma di Debata na diginjang!

H : Amen!!

… hundul…

08. K o o r : Pungan Ina HKBP Tangerang Kota

09. Marende NO. 697 : 4 “Molo Ho do huihuthon.”

Marparange na badia ma au diadopanMi,

Sai patau ma au tiruan, songon pinangidoMi.

Hotong tong ihuthonongku, Jesus na palua au

Ho sambing do oloanhu ala nii martua au

10. Manjaha Epistel : 2 Timoteus 4 : 1-5

L : Turpuk Epistel di Minggunta sadarion, i ma na tarsurat di 2 Timoteus 4 : 1-5, songon on ma didok disi :

Di jolo ni Debata dohot Kristus Jesus, na ro manguhumi angka na mangolu dohot na mate, huhatindangkon nang hapataronna, nang harajaonna.

H : Jamitahon hata i, hajongjongkon di tingki na une nang so une; pinsang, paingot, apoi marhitehite nasa lambas ni roha dohot pamodaion.

L : Ai na ro ma tingkina, ndang tartahan halak disi poda na tingkos i; alai mangihuthon hisaphisap sandiri ma alaponnasida pangajari na pageokgeokkon pinggolnasida.

H : Taitonnasida ma pinggolnasida sian hasintongan i, laho paelengkonsa tu angka turiturian.

L : Alai anggo ho, sandok unang ma mabuk roham, taon ma na jat i; radoti na tama ulaon ni parbarita na uli; sahat ula tohonanmi!

I ma sahatna! Martua do angka na tumangihon hata ni Debata jala na umpeopsa.

H : Amen !

11. K o o r : CCS Dian Harapan

12. Marende BE No. 714 :2+4

Tuhan parmahan haposan dongan na sumurung i.

Sai padao pangunjunan togu ma na lilu i.

Tuhan Jesus Sipalua pasupasu ruasMi.

Tuhan Jesus Siparmahan pasupasu ruasMi

...jongjong...

Pabotohon ma tu hami siradotannami i.

Tuhan gohi rohanami dohot haholongonMi

Tuhan Jesus Sipalua, ndnag tarasam holongMi

13. MANGHATINDANGKON HAPORSEAON

L : Hamu angka dongan ! Rap dohot angka donganta sahaporseaon di sandok portibion, tahatindangkon ma hata haporseaonta i, rap ma hita mandok:

H : Ahu porsea di Debata Jahowa … dst.

— hundul —

14. K o o r : Punguan Ama Tanahtinggi Tangerang Kota

15. TINGTING

16. TANGIANG PANGONDIANON

17. K o o r : Elshaday Tangerang Kota

18. Marende BE No. 826 : 1 ... ”Gohi au Tuhan”

[ PELEAN 1A & 1B ]