Amang... ilangki !

Jakarta, kota na mansai ribur. Nunga godang inganan parmeaman (tempat wisata) naung hudalani disi. Alai na margoar Tugu Monas, i pe hea dung di taon 2009 on. Ai manang piga halak na ro sian hita an tu Jakarta, somalna mintor diboan do mardalani tu ”simbol” ni kota Jakarta i. Hape ahu... on pe hea dung lobi tolu taon tinggal di Jawa on.

Anggo sihol ni roha mardalani tu Tugu Monas ndang pola adong. Ai so pola adong siberengon sian i ninna rohangku do. Di na sahali, tongon mardalani ahu dohot sada dongan sintua tu Kernolong, adong ma di rohanami laho mandalani Tugu Monas tu bagasan. Anggo amanta sintua i nunga dua hali ninna mamboan keluarga tusi. Ala hudok ahu ndang hea dope gabe ditogihon ma ahu. Mardomu muse ala nunga songon na ngalut daging ala kareta (motor) do dalannami tingki i. Ninna roha mangaso ma jolo di bagasan Tugu Monas i, mangalap gogo.

Dung masuk hami tu bagasan, adong dua tiket situhoron, na sada holan mamerengmereng museum jala arga ni tiketna ummura. Na sadari dohot manaek tu ginjang, tu panatapan na jonok tu dila ni api na sian mas i. Anggo amanta sintua i ndang pola be dohot tu ginjang, ala naung hea. Holan sahalakhu ma mambuat tiket manaek tu panatapan i. Ala ndang pola ribur jolma na ro, gabe so pola marbaris (antri) laho masuk tu lift. Mansai hatop do sahat tu ginjang.

Huida ma tutu sian panatapan na timbo i sude na humaliang Jakarta. Angka jolma na ditoru pe huida mansai metmet songon porhis. Hape huida ma adong ’teropong’ asa boi mamereng na doi i gabe songon na jonok. Adong opat teropong i, inganna di ganup suhi ala opat suhi do panatapan i. Ala antar longa do jolma hatiha i, adong ma sada na kosong. Mintor hatop ma hujangkit jala husollophon ma simalolongku tu teropong i. Bah... golap do. So tarida manang aha. E tahe tanda ma parhutahuta, ninna roha ni angka na mamereng ahu do ra di tingki i. Alai anggo ahu mandok, na sega do on. Ala ni do asa ndang adong nangkin halak mamereng sian teropong i, i do di rohangku.

Dung i husoluk ma teropong na asing dung sidung dipangke halak. Anggo on ndang na sega be on, ai boi do dibereng nasida nangkin sian on. Husollophon ma muse simalolongku tu teropong i : “Bah… tong golap. Nga sega be on, nga diototoi be ahu.” Ndang hutorushon be antong mamereng teropong na asing, nga maila be ahu.

Ndang sadia leleng mintor huida sahalak baoa na manjujui halak manuhor hepeng rense (coin), i pe asa huboto na ingkon hepeng rense i do pangkeon tu teropong i asa boi berengon. Amang ilangki !

Hutuhor ma hepeng rense i arga 2000 rupia, dung i boi ma tutu huida sian teropong i. Eh tahe, on ma molo pamalomalohon, aut hutogihon ma amang sintua i ndang pola maila ahu songon on. Alai mauliate ma, sada parsiajaran nunga boi binagihon tu angka dongan… naso hea dope tu panatapan Monas-Jakarta.

Alai tong do huparrohahon angka halak na asing na manaek tu ginjang i... hape ndang holan ahu na songon i. Godang do dongan naso mamoto hape. Gabe moru ma otik ila ni rohangku… Hahaha....

Turun ma ahu tu toru, huida ma amang sintua i nunga modom di balebale :) ... renges situtu...hhzzzz...zzzzz...

Pesan :

1. Unang maila manungkun molo so binoto!
2. Unang pamalomalohon!
3. Mansuba angka na imbaru di roha ndang pola sala i !
4. Unang parengkeli hamu ahu, hamu pe hea do songon i :)