ASI NI ROHA, DAME DOHOT HOLONG

Judas 1:2

Singkop ma di hamu asi ni roha dohot dame dohot haholongon ni roha!

Laho pasahathon sidohononta hita tu halak, ringkot do jolo dibuha marhite tabe manang salam huhut taboto keadaan manang baritana. Hirim ni rohanta nian, ia halak na taangkupi manghatai dalam keadaan baik, sehat huhut marlas ni roha. Molo dung songon i tabo ma hita pasahathon sidohononta, manang na poda pe i manang na pangidoan.

Songon i do lambok ni roha ni si Judas, anggi ni si Jakobus (ay.1) manise na hinaholonganna mandok ringkot ni rohana pasahathon sipaingot tu angka ruas na ni dapothonna marhite suratna. Surat ni si Judas on disurathon laho mamodai angka panjaha asa jamot tu angka pangajari pargapgap na mandok dirina Kristen. Asa tongtong marsitutu nasida mangalo nasa pangajaran na lipe, unang gabe lilu haporseaonnasida. Dipasahat do tabe mandok: singkop ma di hamu asi ni roha dohot dame dohot haholongan ni roha! Hata on dipasahat laho patoguhon rohanasida anggiat asi ni roha, dame dohot holong ni roha na sian Tuhan i tongtong mian di tongatonga nasida.

Na patut tapahusorhusor di rohanta marhite turpuk sadari on i ma :

1. Asi ni roha, na marlapatan ma i kesempatan manjalo barita na uli na sian Tuhan i. Holan ala asi ni rohaNa do asa malua hita. Ndada ala ni denggan ni ulaon manang jasanta umbahen na disesa dosanta. Unang disalah-artikan asi ni roha i laho menghalalkan nasa ulaon na jahat. Angka na so daulat, angka na pabalikkon asi ni roha ni Debata tu pargadombuson, gabe disoadahon nasida do Raja i dohot Tuhanta na sasada i, Jesus Kristus i (ay.4). Asi ni roha i dipasahat tu angka na porsea jala na mangulahon lomo ni roha ni Debata. Alai anggo angka siula hajahaton uhumon ni Debata do i. Songon tu halak Israel na ruar sian tano Misir, disiaphon do angka na jahat alai dapotan asi ni do angka na daulat roha.

2. Dame,  i ma sikap na manjalo pardameanta dohot Debata marhitehite Tuhan Jesus Kristus. Kristus pe ro tu portibi on laho mamboan hadameon do. Ido asa digoari Ibana Raja Shalom, Raja ni hadameon. Molo dung mardame hita dohot Debata, tontu tercipta ma hadameon nang di rohanta dohot di parsaoranta. Ndang dihalomohon Debata (songon i do nang hita jolma) masa hagunturon, parbolatbolatan, bada. Holan angka na holang sian Tuhan i do, na ro sian sibolis, sai mangalului dalan manggaori partibi on.

3. Holong ni roha, on ma rumingkot adong di diri ni angka na porsea. Sude na tahatai dohot na taulahon di ngolu on ingkon do sasintongna marojahan di holong ni roha. Alana, i do tong inti ni barita na uli na pinasahat ni Debata tu hita. Holong (agape) na sian Debata diwujudnyatakan do i marhite Jesus Kristus, na dilehon tu hamatean humonghop hita. HolongNa i do tong na ingkon taulahon huhut ta pararat tu saluhut halak, ndang mardia imbar. Amen