MASIHOHOT MANGIHUTHON JAHOWA

Josua 14:8

Alai anggo donganku, angka na nangkok rap dohot ahu, mangganggui roha ni na torop i; alai anggo ahu sun do parsihohot ni rohangku, mangihuthon Jahowa, Debatangku.

Mansai godang do angka tantangan na taadopi di parngoluon on. Alani ringkot habaranion laho mangadopi angka tantangan i. Disok angka pande sukses ingkon rade do magadopi resiko molo naeng berhasil manang mendapatkan hasil yang lebih tinggi. Lam borat resiko lam tang ma mangadopi angka tantangan i jala lam dumenggan ma nanidapotna.

Keberhasilan manang kesuksesan ni si Josua ala dihaposi si Musa do Ibana, ala tongtong marsihohot manghaporseai Jahowa uju disuru mangkahopi huta Kanaan. Sian 12 halak nasinuru ni si Musa holan 2 halak do na barani mangadopi halak Kanaan ala dihaposi nasida Jahowa. Alani gabe dipasahat ma kepemimpinan tu si Josua manggantihon si Musa. Manguluhon Israel sada ulaon na borat do i. Umborat sian na manaluhon halak Kanaan i. Boasa? Borat ala : parjolo,  na ginantihonna sahalak pemimpin na hebat, boi do ibana manorushon songon kepemimpinan ni si Musa? Na pasti ibana do gabe ditodo Debata manggantihon. Paduahon, na niuluhonna sada bangso na tangkang na sai jotjot memberontak tu Debata.

Ala haposan si Josua, gabe dipasahat Debata ma tu ibana ulaon na umbalga manggantihon si Musa. On ma kesuksesan na luar biasa sian si Josua na boi patut guruhononta di parngoluan on. Aha do rahasiana? Ala sun do parsihohot ni rohana mangihuthon Jahowa. Jadi, manang aha pe na talului manang tasangkapi di hangoluan on sai na jumpang do molo marsihohot mangihuthon Jahowa. Si Josua ma buktina. Ai angka na masihohot mangihuthon Jahowa ndang be mabiar mangadopi angka resiko, ala nunga mardalan ibana dibagasan hatigoran. Taingot do hata ni Tuhan Jesus molo haposan di na otik pasahaton ma tu ibana godang. Molo haposan hita di ulaon na sederhana, nda pasahaton ni Debata ma tu hita tanggungjawab na umbalga? Disi do halobian ni angka orang-orang besar na tuk manguba portibi on. Alai taingot ma ojahanna masihohot mangihuthon Jahowa. Amen

DAPOTAN ASI NI ROHA

Ulaon ni Apostel 9 : 36

Dung i adong ma di Joppe parompuan sada na porsea, na margoar Tabita, astuanna hije (Dorkas), na sumurung mangulahon na denggan dohot mambahen asi ni roha.




Adong do sada kegiatan manang ulaon ni huria mulamula i na mambahen lam rarat harajaon ni Debata, i ma visitasi (perkunjungan). Langsung ro mandapothon angka ruas i huhut mangajari dohot patupahon tanda halongangan marhitehite goar ni Tuhan Jesus. Sian huta tu huta do Apostel Petrus patupahon ulaon i gabe lam torop halak angka na mangihuthon Kristus.

Uju di huta Lidda dope Apostel i nunga sahat barita tu ibana aha na masa di huta na jumonok tusi i ma huta Joppe. Adong sahalak na margoar Tabita, marsahit laos mate. Hape tarbarita do ibana sahalak na sumurung di angka ulaon na denggan huhut godang mangulahon asi ni roha uju di ngoluna. Alai marhite na masa tu si Tabita naeng marsangap goar ni Tuhan i. Gabe ro ma Apostel Petrus mamereng na masa i huhut mamboan barita las ni roha, marhite huaso ni Tuhan i mulak mangolu do si Tabita. Alani barita i gabe torop do halak na di huta Joppe gabe porsea tu Debata.

Ndada holan halongangan i sambing na taida sian na masa turpuk on. Alai naeng do tangkas botoonta : Parjolo, marhuaso do angka na porsea i patupahon angka tanda halongangan asal ma mangasahon goar ni Tuhan Jesus. Paduahon, dapotan asi ni roha do halak siulahon na denggan dohot na marasi ni roha tu donganna songon si Tabita i. Patoluhon, asa marsangap do Tuhan i marhite ulaonta, jala lam torop halak na porsea di Tuhan i.

Alani manang aha pe ulaon na pinasahat ni Tuhan i tu hita, tatiru ma songon Apostel Petrus na sai ringgas marbarita na uli mangasahon Goar ni Tuhan Jesus. Dohot songon si Tabita na sai sumurung mangulahon na denggan dohot mambahen asi ni roha. Na sada dapotan gogo dohot huaso na sada nari dapotan asi ni roha manang hangoluan. Amen

ASI NI ROHA, DAME DOHOT HOLONG

Judas 1:2

Singkop ma di hamu asi ni roha dohot dame dohot haholongon ni roha!

Laho pasahathon sidohononta hita tu halak, ringkot do jolo dibuha marhite tabe manang salam huhut taboto keadaan manang baritana. Hirim ni rohanta nian, ia halak na taangkupi manghatai dalam keadaan baik, sehat huhut marlas ni roha. Molo dung songon i tabo ma hita pasahathon sidohononta, manang na poda pe i manang na pangidoan.

Songon i do lambok ni roha ni si Judas, anggi ni si Jakobus (ay.1) manise na hinaholonganna mandok ringkot ni rohana pasahathon sipaingot tu angka ruas na ni dapothonna marhite suratna. Surat ni si Judas on disurathon laho mamodai angka panjaha asa jamot tu angka pangajari pargapgap na mandok dirina Kristen. Asa tongtong marsitutu nasida mangalo nasa pangajaran na lipe, unang gabe lilu haporseaonnasida. Dipasahat do tabe mandok: singkop ma di hamu asi ni roha dohot dame dohot haholongan ni roha! Hata on dipasahat laho patoguhon rohanasida anggiat asi ni roha, dame dohot holong ni roha na sian Tuhan i tongtong mian di tongatonga nasida.

Na patut tapahusorhusor di rohanta marhite turpuk sadari on i ma :

1. Asi ni roha, na marlapatan ma i kesempatan manjalo barita na uli na sian Tuhan i. Holan ala asi ni rohaNa do asa malua hita. Ndada ala ni denggan ni ulaon manang jasanta umbahen na disesa dosanta. Unang disalah-artikan asi ni roha i laho menghalalkan nasa ulaon na jahat. Angka na so daulat, angka na pabalikkon asi ni roha ni Debata tu pargadombuson, gabe disoadahon nasida do Raja i dohot Tuhanta na sasada i, Jesus Kristus i (ay.4). Asi ni roha i dipasahat tu angka na porsea jala na mangulahon lomo ni roha ni Debata. Alai anggo angka siula hajahaton uhumon ni Debata do i. Songon tu halak Israel na ruar sian tano Misir, disiaphon do angka na jahat alai dapotan asi ni do angka na daulat roha.

2. Dame,  i ma sikap na manjalo pardameanta dohot Debata marhitehite Tuhan Jesus Kristus. Kristus pe ro tu portibi on laho mamboan hadameon do. Ido asa digoari Ibana Raja Shalom, Raja ni hadameon. Molo dung mardame hita dohot Debata, tontu tercipta ma hadameon nang di rohanta dohot di parsaoranta. Ndang dihalomohon Debata (songon i do nang hita jolma) masa hagunturon, parbolatbolatan, bada. Holan angka na holang sian Tuhan i do, na ro sian sibolis, sai mangalului dalan manggaori partibi on.

3. Holong ni roha, on ma rumingkot adong di diri ni angka na porsea. Sude na tahatai dohot na taulahon di ngolu on ingkon do sasintongna marojahan di holong ni roha. Alana, i do tong inti ni barita na uli na pinasahat ni Debata tu hita. Holong (agape) na sian Debata diwujudnyatakan do i marhite Jesus Kristus, na dilehon tu hamatean humonghop hita. HolongNa i do tong na ingkon taulahon huhut ta pararat tu saluhut halak, ndang mardia imbar. Amen

GIRGIR MANGALEHON TU JAHOWA



2 Musa 35:29

Nasa baoa dohot parompuan sian halak Israel angka na tarsunggul rohana be gabe girgir mamboan silehonlehon manumpak ulaon marragamragam, na tinonahon ni Jahowa marhite sian si Musa, sibahenon ni halak Israel bahen pelean tu Jahowa.

Tu ise do hasahatan ni angka peleanta na saleleng on? Toho do i sahat manang dijalo Debata? Sungkunsungkun on jotjot do ro tu rohanta. Pangantusion ni sahalak dakdanak sikola minggu marasing do tu hita angka naung dewasa. Molo dakdanak sikola minggu dirajumi rohana do pelean i langsung (harafiah) dipasahat tu Debata. I do asa adong dakdanak na mandok "uang Tuhan" hilang dan yang tinggal di tangannya adalah uang jajan. Molo hita mangalapati pelean na tapasahat tu Tuhan i boi do marrumang hepeng (pelean na tapasahat ganup minggu manang pelean bulanan), peleanta i boi do tingki, gogonta, pingkiranta dohot angka na asing na boi pelehononta (dikurbankan) bahen hasangapon ni Tuhan i.

Di aturan naung tinotophon ni Jahowa tu halak Israel laho pauli undungundung ni Jahowa, ganup do halak Israel, baoa manang boruboru, tarsunggul rohana mamelehon peleanna. Molo didok tarsunggul rohana mangalehon pelean, astuanna pasahathon sian nasa rohana, na dumenggan dilehon tu Jahowa. Adong do na pasahathon leangna, tintinna, horunghorungna na marrumang sere manang perak bahen paulihon undungundung ni Jahowa (ay.22). Ndang jadi marungutungut, sandok sian roha na ias do dipasahat nasida pelanna i tu Jahowa. Molo tapamanat angka pelean i, na ummarga jala na dumenggan do hape dipasahat tu Tuhan i.

Marasing situtu do na masa nuaeng on di hurianta. Mansai jotjot dapot angka hepeng (ndang pelean!) naso langku. Sahira katong sampah do sipata dibahen na deba kantong pelean i. Aha do na tapelehon tu Debata? Molo ias ni roha do songon nanidok ni endeta i, manang ala ni roha na tarsunggul, nda tung barani pulut hita laho pasahathon na buruk.

Nian songon nadidok na di ginjang nangkin do, ndang langsung pelean i sahat tu Debata. Alai marhite tangiangta na mandok : "Pasupasu ma i jala ramoti asa huparhaseang hami pelean on patimbulhon harajaonMu di tongatonga ni huriaM dohot di portibi on". Mansai tangkas do pelean i sahat tu Debata, tujuanna asa lam rarat harajaonNa di huria dohot di sandok portibi on.  Dibahen i tangkas ma hita pasahathon pelean tu Jahowa marhite roha mauliate, jala sian parbue ni haporsean biar mida Jahowa ma hita pasahathon na dumenggan i. Antong barani pulut dope hita pasahathon pelean hurang denggan i?

MANGHAHOLONGI SIAN NASA ROHA

1 Petrus 1:22
Paias hamu ma rohamuna, marpangoloion di hasintongan, mangeahi haholongon na so marlaok di dongan, asa masihaholongan situtu hamu sian nasa roha.

Manghaholongi dongan, i ma sada ulaon naso dung hea sidung taulahon saleleng mangolu. Debata sandiri nunga dipatuduhon singkop holong ni rohaNa tu jolma marhitehite Tuhan Jesus Kristus. Dihaholongi Debata jolma marhite na sumeahon hosaNa sandiri. Ndang targarar hita i marhite sere manang perak, ala ndada binahen ni sere manang perak, angka na olo buruk, umbahen na malua hita. Alai binahen ni mudar ni Kristus na arga i do. Disi do sasintongna dapot hita hagogoon ni HOLONG i. Ai diajari Debata do hita manghaholongi songon na binahenNa i, asa manghaholongi gabe bagian ni jati dirinta, ndada ala na mamereng objek sihahologon i. Anggo ingkon marsayarat do hita manghaholongi, isarani ingkon burju ibana, ingkon adong balosna dohot lan angka na asing, holong na mamparbuat do goar nii.

Maniru holong ni Kristus, na ringkot taulahon i ma : Parjolo,  Paias roha : Roha na ias do dibongoti Tondi Parbadia. Parroha na ias sai angka na denggan do di sangkapi tu donganna, ndang sai marpingkiran negatif. Molo sai ias do rohanta mambahen na denggan tu dongan, tontu tausahahon do asa mambahen las roha ni donganta. Molo dung songon i tubu ma holong na masihaholongan, masiadu ma mambahen na denggan.

Paduahon, marpangoloion di hasintongan : Ojahan ni holong na tutu i ma hasintongan. Ai adong do holong ni sesama parjahat. Gariada ussigop do idaon nasida masiurupan molo masa parungkilon di donganna parjahat. mintor hatop do nasida margugu rupani. Alai ojahannasida ndada hasintongan. Ummaol do tarida sipata ulaonna masiurupan di angka na sapunguan di huria. Molo masa hamaolon di donganna, antar maol dope sigop laho mangurupi donganna na marungkil. 

Marhite hata ni Debata sadari on diajari Debata do hita asa dibagasan pangoloion tu hasintongan hita laho patuduhon haholongon i. Ingkon humebat sasintongna holongta na di huria sian na dibalian, boasa? Ala marojahan holong ni rohanta tu hasintongan, i ma hata ni Debata. Antong, taulahon ma holong ni roha i sian nasa rohanta, asa gabe ahalak Kristen na martua hita taruli di pasupasu na godang. Amen