IDA MA, INGKON TULUS SANGKAP NI TUHAN I

Lukas 18 : 31

Alai diarahon ma na sampuludua i, ninna ma mandok nasida: Na nangkok ma hita tu Jerusalem jala tulus ma tu Anak ni jolma i sasudena, na tarsurat di angka panurirang i.
-ooo-
 Yesus memanggil kedua belas murid-Nya, lalu berkata kepada mereka: "Sekarang kita pergi ke Yerusalem dan segala sesuatu yang ditulis oleh para nabi mengenai Anak Manusia akan digenapi.

Manatap tu jolo manaili tu pudi, i do hata na arga di hata batak taringot tu partingkian. Manatap tu jolo i ma na naeng masa dope, so ise na umbotosa ia so holan Tuhan i.  Diboto Jesus do na naeng masa di joloNa : sitaonon, parungkilon (penderitaan) nunga paimahon hombar tu naung niaturhon ni Ama i. Manaili tu pudi i ma naung masa najolo, nunga dipabotohon hian di masa ni angka panurirang. Jala unokna sasintongna naeng mandok : Ingkon saut sangkap ni Debata Ama i marhite AnakNa Jesus Kristus.

Maol do diantusi angka sisean pangajarion ni Jesus taringot tu sitaonon sidalananNa. Nang pe naung leleng nasida rampak dohot Tuhan Jesus. Jala nunga godang dijalo nasida angka parsiajaran na arga marhite pangajarion dohot pambahenan ni Tuhan Jesus.  Alai tutu mapitung do nasida marnida di misi ni Tuhan Jesus ro tu portibi on. Ndang diantusi alai mabiar manungkun. Jadi diboto do mapitung nasida alai ndang olo mangido asa dibuha Jesus mata ni haporseaonnasida. Hape di udut ni ayat on  (ay.35-43) dipamalum Jesus do sahalak na mapitung. Ala diboto jala dihaporseai na mapitung i Jesus do Mesias Anak ni Debata, na marhuaso pamalumhon nasa sahit gabe dipangido ma asa dibuha matana sian na mapitung i. Saut ma tutu dipamalum jala dibuha matana. On ma na nidokna ia na marsimalolong ndang boi marnida (mapitung), hape ia na mapitung boi marnida. Ai sahat tu na diarahon Jesus angka sisean i nangkok tu Jerusalem ndang diboto nasida dope sangkap ni Debata Ama taringot Anak ni jolma i.

Nang hita pe olo do songon i. Nunga na sai jotjot hita manangihon hataNa, tu parmingguan, partangiangan mabege jamita, sandok targoar “na burju” ma hita mangihuthon Tuhan Jesus, hape olo do ndang taboto aha do lomo ni roha ni Tuhan i siulahononta. Ai na mapitung ma hita molo so taboto sangkap dohot lomo ni roha ni Tuhan i, nang pe sai ringgas mambege hataNa. Songon angka sisean i sai laon rap dohot Jesus alai ndang diantusi pambahenan ni Gurunasida i.

Nuaeng na patut siulahononta i ma asa tongtong tabuha mata ni haporseaonta mananda Tuhan i. Hamamatena do dalan manghophop dohot paluahon hita sian hamatean. MudarNa na durus i do na mamuri saluhut dosa pangalaosionta. Molo dung tangkas hita mangantusi dohot mananda pambahenan na arga dohot holong ni Tuhan  i tu hita marhite sitaonon, hamamateNa di hau pinarsilang dohot haheheonNa, gabe taboto huhut taulahon ma angka sangkap dohot lomo ni roha ni Tuhan i. Amen