IA I DIULA HO, I DO TAPUONMU

Mateus 12:37
"Ai marhite tu angka hatami do ho pintoranNa manang uhumonNa sogot!"
HATORANGAN:

Tanda halongangan angka na pinatupa ni Jesus marpanghorhon tu dua golongan na marasing na marnidasa. Na parjolo, angka na torop na longang jala gabe porsea. Alana gabe adong tubu sungkunsungkun dohot pengakuan Jesus anak ni si Daud, Ibana do Mesias na pinarbaga i. Na paduahon, angka Parise ala ni pangiburuonnasida gabe didok sian sibolis hagogoon ni Jesus i. Ndang marroha be nasida marnida angka pambahenan ni Jesus. Nunga holip be sian matanasida angka na denggan na binahen ni Jesus. Mereka kehilangan akal sehat.
Turpuk sadari on, hata na karas do dipasahat Jesus tu angka Parise i. Ai pola dipatudos nasida tu anak ni ulok jala na jahat (ay.34). Jala hajahaton ni rohanasida pola do sahat tu dosa naso hasesaan, i ma na manulak Tondi Parbadia (ay.32). Lapatanna, pola sampe mangatasi dosa naso tarsesa pangalahonasida ala so olo patutoru diri huhut mangungkap rohanasida tu barita na binoan ni Jesus.Dison ma dipatuduhon Jesus ise do nasida sasintongna. Marhite umpama na pinasahat ni Jesus taringot tu hau dohot parbuena gabe patar ma tarida ise angka Parise i sian hata dohot pambahenannasida. “…ai matua sian parbuena do tandaon hau”, ninna Jesus tu nasida (ay.33). Di mulana hira na manghilala do angka Parise i di atas angin boi manaluhon Jesus. Hape hata nasida na jahat i do muse dipangke Jesus laho patuduhon hinajorbut ni pangalahonasida.
Marhite barita na di turpuk on boi do mansai sogo rohanta dompak angka Parise i. Ala songon i ma songir ni hajahaton nasida. Toho do na jahat rohananasida dompak Jesus. Alai nuaeng on boi do dos tusi pangalaho ni jolma i, mansai jahat hata dohot pambahenanna. Manihai, manginsahi, manggasipi dohot mambahen hansit ni roha,ni donganna. Na ruar sian pamangan ni jolma laos i do baloson ni Debata tu jolma i. Molo angka hata na denggan dohot pasupasu do na ruar sian pamanganta, pasupasu ma tutu parbue ni ngolunta. Alai molo hata na jahat dohot bura do na ruar sian pamanganta, parbuehonon ni ma bura nang di ngolunta. Ingot ma, ia i diula ho, i do tapuonmu. Amen!

JAHOWA DO HAPOSANKU

Psalmen 28:7a

Jahowa do pargogongku dohot lombulombungku, marhaposan tu Ibana do rohangku.

HATORANGAN:

Hea do tahilala uju martangiang hita hira na tarambat di langitlangit ni jabunta i tangiangta? Manang hira naso sahat tangiangta i tu banua ginjang? Tontu molo masa si songon i mintor tadok do naso parduli Debata di hita, hira na dipasombu hita sandiri mangadopi angka hamaolon na manosak ngolunta. Keadaan sisongon i olo do mamboan hita tu pandelean, ndang binoto be manang tudia tujuan ni ngolu on.

Pengalaman songon na di ginjang i ndang pola songgot be roha mambege i. Halak Kristen pe torop do na mangadopi situasi songon i. Haru parpsalmen sandiri, i ma si Daud na hinaholongan ni Debata, tong do manghilala na songon i. Mauhom do Debata dompak ibana. Jala ndang adong tanda na naeng ro Debata mangurupi, …unang sai sip Ho, manundali ahu, ninna ibana (ay.1). Boha do si Daud mangadopi na masa i? Marbalik do rohana dompak debata na asing? Ndang! Sai tong do manghirim ibana tu Debata, jala laos dipagomos do manjouhon “Tu Ho do ahu joujou, ale Jahowa, partanobatoanku…” Porsea situtu di ibana naso adong pangurupion sian na asing dungkon ni Debata. Ai ngolu naso mardonganhon Debata jala na holang sian Ibana diboto si Daud do tu hamagoan ujungna. Jala i do na mambahen ibana marsihohot martangiang tu Debata, asa anggiat nian martinangi Debata sian banua ginjang. Molo pe songon na sip Debata, diboto si Daud do, ndang salelengna masa songon i. Hatop manang na lambat porsea do ibana maralus tangiangna i.

Joujou ni si Daud i muba gabe pamujion dohot las ni roha di ay.6-9. Jala dihatindannghon ibana di rohana : Jahowa do pargogongku dohot lombulombungku, marhaposan tu Ibana do rohangku (7a). Tabahen ma Debata haposanta, manongtong martangiang tu Ibana uju ro hagogotan nang pe songon na hohom Debata dompak hita. Taingot ma, maninggalhon Debata dao do humansit ngoluna (fatal) sian na manghilalahon hira na so parduli Debata uju ro hamaolon tu ngolunta. Amen!

UNANG MANDELE

<!--[if gte mso 9]> Normal 0 false false false EN-US X-NONE X-NONE

Jesaya 49:4

Alai anggo ahu, ninna rohangku do: Ndang marguna na ngalutan i ahu magopo sambing do gogongku hupasudasuda; hape Jahowa * patingkostingkos uhum tu ahu, jala upangku di lambung ni Debatangku do.

HATORANGAN:

Turpuk on i ma panurirangon ni si Jesaya taringot tu ulaon ni naposo ni Debata. Naposo ni Debata i ma na pinillit ni Debata gabe ulaulaNa laho papatarhon dohot mangulahon lomo ni rohaNa (ay.2-3). Tangkas do misina i ma laho papunguhon bangso Israel naung marserak ala ni uhum ni Debata tu nasida. Alai dibagasan misi i gabe panulakon do na ro na mambahen “hampir” mandele ibana umbahen na didok : Ndang marguna na ngalutan i ahu magopo sambing do gogongku hupasudasuda (ay.4a). Alai alus ni Debata justru lam pabidang misina do, ndada tu halak Israel sambing be sahat haluaon i, alai dohot do tu angka bangso na asing (ay.6).

Nang pe songon i, tangkas do naso holan marsuru Debata di naposoNa ihut do muse jaminan ni ngolu ni naposoNa i dilehon, ninna do : “hape Jahowa * patingkostingkos uhum tu ahu, jala upangku di lambung ni Debatangku do” (ay.4b). Jala pahoton ni Debata ibana di tongatonga ni angka bangso na manghabiashon ibana (ay.7). Sangkap ni Debata ingkon tulus marhite naposoNa, paluahon parjolo bangso Israel, dungi sahat tu angka bangso parbegu dohot jaminan keberhasilan nang pe godang angka hamaolon.

Naso jadi mandele hape naposo ni Debata mangulahon parsuruonNa nang pe godang jala dokdok hamaolon (tantangan) songon na nidok ni turpuk sadari on. Hita do naposo ni Tuhan i, saluhut angka na porsea di Jesus Kristus. Alani parade ma dirim pangkeon ni Debata gabe naposoNa. Ulahon ma na dumenggan di Ibana. Unang mura mandele nang pe godang hamaolon na taadopi laho manghatindangkon Ibana, ingot ma bagabagaNa na mandok : sai na dongananku do hamu ganup ari, rasirasa ro ajal ni hasiangan on! (Mat.28:20). Amen!

ISE DO NAMPUNA HO?

I Korint 6:19

Ndang diboto hamu: Dagingmuna do joro ni Tondi Parbadia, na di bagasan hamu, naung jinalomuna sian Debata; ndada hamu nampuna dirimuna.

HATORANGAN:

“Jesus Ho nampuna au, dohot na adong di au,gogo dohot hosangki, sahat ma tu tanganM.” On ma sada bait sian Buku Ende No.470 na patuduhon pameleon diri hibul tu Debata. Domu tusi do na nidok ni turpuk sadari on tu hita. Na dipaingot Ap. Paulus do huria na di Korint asa diingot nasida na sian haholomon (pardosa) do nasida najolo alai nuaeng nunga dipaimbaru jala dipamonang nasida marhitehite Jesus Kristus. Konsekuensi ni perubahan status i ingkon rade ma nasida maninggalhon angka dosa nasida na salpu. Ndada songon kebebasan na parjolo be angka parange nasida. Na marguna tu ngolu dohot pasangaphon Debata i ma nian dapot sian angka parange ni halak Korint i. Jala sipaingot do i nang tu hita asa unang olo hita diparhatoban mamang aha pe.

Nunga singkop dipalua Debata angka na porsea i marhite panobusion ni Jesus Kristus di hamateNa. Alani tung naso jadi be pelehonon dagingta on tu manang aha na maralo tu lomo ni rohaNa. Ai nunga gabe nampuna ni Kristus be dagingta. Di ayat 20 i didok : Ai arga do hamu ditobus: Dibahen i pasangap hamu ma Debata marhitehite dagingmuna dohot marhitehite tondimuna; ai Debata do nampuna i. Marhite i ndang adong be sidalian ni hita angka na porsea asa mulak muse mangulahon dosa.

Unduk tu paraturan jotjot do i di na deba gabe boban (belenggu) na mambahen ndang bebas be mangulahon lomo ni rohana. Alai taingot ma molo margogo do hita mangalo hagiot ni dagingta, malua ma hita sian parhatobanon ni dosa. Dung malua hita, gabe halak na bebas ma hita, bebas mamangke dagingta on bahen hasangapon dohot hamuliaon ni Tuhan i. Antong tapelehon ma dagingta, ngolunta tu Jesus asa Ibana nampuna hita. Manang aha pe na taula sai angka na marguna tu ngolunta ma i dohot laho pasangaphon Tuhan i. Amen