PARMAHAN NA MANOLONGI BIRUBIRU-NA

Hesekiel 34 : 22

Dibahen i Ahu ma manolongi birubirungHu, asa unang be ripe pupusan, jala Ahu mamutus uhum di holangholang ni birubiru martimbanghon birubiru.

Torop do rakyat Indonesia na kecewa di pemerintahan ni negaranta si nuaeng on ala ndang denggan fungsina mardalan laho mamboan rakyatna tu hasonangan (kesejahteraan). Hape nasida do parmahan ni bangso on na disuru marhobas tu rakyatna. Songon i do angka raja ni Israel uju i na maninggalhon tanggujawabna. Disuriranghon Panurirang Hesekiel do taringot tu raja ni Israel naso bertanggungjawab marmahani birubiru (bangso Israel) na pinasahat ni Tuhan i tu nasida. Nanggo dihaholongi pe ndang. Holan na mamingkirhon dirina nama diharingkothon, ndang olo be marpanarihon  (ay.3). Egoisme na songon i tontu gabe paro rimas ni Jahowa tu angka raja na targoar parmahan i. Na gabe dirimpu do nampuna ni ibana birubiru i, hape Jahowa do nampunasa. 

Hita do bangso na pinarmahan ni Tuhan i nuaeng. Jala Ibana do tutu parmahan na denggan sitiruon di hita. Ditogu do hita tu jampalan na lomak dohot tu aek hasonangan (Psalm 23). Lapatanna na tu na denggan do dipatongon Jahowa ngolunta, tu hasonangan, unang nian susa. Alani ndang lomo roha ni Debata marnida pangalaho ni pemimpin i na manusai na ginonggomanna, ndang lomo roha ni Tuhan i jolma manusai donganna jolma. Alai taida ma nuaeng, sai adong do oknum (raja, pamarenta, parhalado, dla) na mandok dirina parmahan alai ndang tutu mamarmahani ruasna. Nunga toropan na holan mamingkirhon dirina, boha ma asa hot hudul di jabatanna, boha ma asa lam godang artana, boha ma asa boi dimanfaathon angka birubiru i mangalului keuntungan pribadi. Gabe tubu ma hamongkuson na menghalalkan segala cara. Parmahan i gabe babiat panoro tu angka na pinarmahanna. Dihagigihon Jahowa do angka parmahan na songon i, jala ingkon uhumanNa. 

Alani Jahowa bertindak sandiri gabe parmahan na denggan na manolongi angka birubiruna asa unang dipupus (dimangsa) angka pangago i. Songon i do nang hita na digoar birubiru i asa bertanggungjawab di angka ulaon. Jala asa tutu hita na pinarmahan ni Tuhan ingkon tarida sian pangalaho gabe birubiru na burju. Ai Jahowa do na manimbangi dohot mamutus uhum ditongatonganta. Amen.

SITINDANGI NI JESUS

Mateus 10:32

Ai ganup na manghatindanghon Ahu di jolo ni jolma, i do hatindanghononHu di jolo ni Damang na di banua ginjang i. 

Adong do hea sasahalak uju di pangarantoan didok status ugamona di KTP dibahen 'silom'. Hape tangkas do nian Kristen ibana songon i nang natorasna dohot sude keluargana. Alasanna ala tinggal di huta ni angka silom ibana, gabe mengaku silom ma asa aman ibana di luat i. Ingkon bisuk do iba, molo so songon i, ba dia ma boi iba mangolu?, ninna. Na deba hita, ra satolop do di sikap na songon i. Alai mangihuthon hata ni Tuhan Jesus di turpuk on tangkas do dipaingot ia pangalaho na songon i, i ma halak na mabiar jala maila manghatindanghon dirina songon sahalak siihuthon Kristus. Jala Tuhan Jesus pe maila do manghatidanghon halak sisongon i di jolo ni Damang na di banua ginjang i.

Tutu godang do mara dohot hamaolon na ni adopan ni halak siihuthon Kristus saleleng mangolu di hasiangan on. Ro di musu na jahat sahali ingkon adopan ni halak Kristen, i ma induk ni sibolis si Belzebul. Alai ndang tarhahua ni parjahat i hita molo Debata donganta. Songon i do angka sisean ni Jesus, parjolo do dibohali nasida di partondion andorang so borhat pasahathon missi barita nauli. Ai songon birubiru na sinuru tu tonga ni babiat do nasida. Molo gale partondion nasida tontu mura do soroon ni babiat i nasida. Ala ni ingkon songon pasukan tentara ni Kristus nasida na rade mangadopi musu manang songondia pe gogona. Ulaon nasida, i ma manghatindanghon Kristus na hinasogohon ni portibi on.

Pola be mabiar hita mangadopi angka hamaolon ala na mangihuthon Kristus? Ai digombarhon Tuhan Jesus do na tongtong diparrohahon Debata manang aha pe na masa di ngolunta. Ai ummangat do ngolunta on sian amporik sada, gari bilangan ni obuk di simanjujungta dibilangi do. I do umbahen didok : "Unang pola mabiar hamu mida angka na mamunu daging, angka naso tuk mamunu tondi". (ay.28). Diparbaga Debata do lehononNa gogo, huaso (kemampuan) dohot perlindungan di angka na porsea ala mansai arga do hita di adopanNa. Alai ndada gabe malua hita sian angka hamaolon na ro tu dirinta. Sipata diuji haporseaonta songon siihuthon Kristus asa tarida  parsitutuonta na satia mangihuthon Ibana.

Alani unang ma tahutan hita, tapatuduhon ma hasatiaonta tu Tuhan Jesus, ai arga do hita di adopanNa. Huhut taingot on : ndang adong pelean na ummuli asing ni hasatiaon dohot pangoloionta manghatindangkon Ibana. Amen.

JAHOWA GABE HAPOSANMU

Poda 3:25-26

Ndang pola tahutan ho mida hagunturon so panghiriman, manang mida rampokrampok ni halak parjahat, molo ro. Ai Jahowa do gabe haposanmu, jala Ibana mangaramoti patmu maradophon jorgong.

Sipata gabe pesimis do toropan jolma marnida angka na masa di negaranta nuaeng on. Boasa? Ala mansai nalnal pangalaho ni angka parjahat i jala lam mangerbang. Soada be uhum na denggan mardalan. Alai siula na jahat bebas jala lam mangerbang do pasauthon ulaon hajahatonna. Taida ma angka koruptor i, bah, lam marlomolomo do nuaeng. Lan dope angka hajahaton na asing, angka penjilat, angka bandit berdasi, angka "oportunis", ai so nanggo mahua nasida idaon. Ia angka partigor i hira lam disosak, na metmet jala na gale i lam ganda sitaononna. Di dia do keadilan ni Debata? Ido na sai jotjot sungkunsungkun di roha ni jolma, ala ndang sabar rohana paimahon tarurak angka parjahat i.

Unang pola ganggu rohanta disi, ai bagian ni ulaon ni portibi on do i saluhutna. Sian najolo nunga sai manggasa sibolis asa lam sega pangalaho ni jolma.

Songon sahalak ama na sai mambahen na dumenggan tu ianakhonna, songon i do Debata. Olo do sipata sala ianakhonna gabe dipinsang amana asa gabe denggan, asa muba. Debata pe, ndang lomo rohana mangihutihut anakhonNa mangulahon hajahaton. Olo do jolma i mangihutihut mangulahon na jahat ala diida mansai manait jala mamboan tu hasonangan portibi. Anggo Debata dipaingot jala dipinsang do hita asa unang olo tarihut tu pangalaho na maralo tu lomo ni rohaNa. Di tingkina, ingkon uhumon ni Debata do angka parjahat i sian naso panagaman, tompu, songgot ndang adong na umbotosa.

Alani dilehon Debata do di hita bisuk dohot roha asa malo mambuat keputusan di parngoluan on. Alana ingkon sadar do hita ia angka na di humaliang hita sai diarahon do hita tu angka na maralo tu lomo ni roha ni Debata.  Dijouhon hata ni Debata tu hita sadari on asa tongtong marhaposan tu Ibana, ai Ibana do na tuk mangaramoti angka dalanta asa unang tarjorgong, asa unang tartuktuk. Alani molo tung sanga masuk  hita tu jorgong ni sibolis, nuaeng ma tingkina putar haluan, marbalik sian hajahaton gabe mangulaon lomo ni roha ni Debata. Amen!  

PATASAKHON PANGHIRIMON

Heber 6:11-12

Alai dipangido rohanami do, naeng patuduhonon ni ganup hamu ringkot ni roha na songon i, patasakhon panghirimon i sahat ro di ujungna. Unang ma gabe angka na losok hamu; tiru hamu ma angka sitean bagabaga i, marhitehite haporseaon dohot lambas ni roha. 

Patasakhon di kamus Batak marlapatan ma i "menyiapkan apa yang kurang beres, membereskan", alai di Alkitab dilapati "menunjukkan kesungguhan". Na mandok adong na hurang denggan manang hurang parsitutuon di haporseaon. Nian sasaran ni panurat Heber on i ma laho maminsang (teguran keras) angka panjaha ni suratna on ala ni pejet ni haporseaonnasida, ala torop do na marbalik sian Tuhan i gabe marjea. Alai tung pe songon i pos rohana, na tongtong digoar nasida angka anak ni Debata (ay.9) ndada alani pambahenannasida alai ala hasintongan ni Tuhan i do. Tung so dihalupahon Debata do ulaon na denggan dohot holong na pinatuduhonnasida dipanghobasian ni angka na badia na jolo dohot nuaeng (ay.10).

Pangondolhonon ni turpuk on i ma parsihohoton di haporseaon di Tuhan i huhut patasakhon panghirimon jala lam marsitutu manghobasi ulaon ni Tuhan i. Nang pe borat sitaonon ni halak Kristen ujui ala na dilele, alai ingkon manahan do nasida disi, unang sumurut sian haporseaonna tu Tuhan i. Unang gabe losok (jangan lamban), na marlapatan marsitutu jala aktif patuduhon haporseaon dohot lambas ni roha maniru angka sitean bagabaga i. Songon bagabaga na tu si Abraham, songon i ma nang halak Kristen patuduhon parsihohotonna pasahathon diri tu Tuhan i. Kepastian jaminan hasasaut ni bagabaga i gabe lam hot ala Debata sandiri na patupahonsa, jala Jesus Kristus do jaminan i.

On pe, manang ise na marsihohot porsea di jaminan haluaon i, i ma Kristus i, gabe dohot ma hita sitean bagabaga ni Debata. Tarida ma i sian angka pangalahonta siganup ari, manghaholongi dongan, na ringgas mangulahon na denggan (unang losok, jangan lamban), huhut tongtong mandok mauliate tu Tuhan i. I ma tanda ni na mangolu panghirimonta, na sai tongtong manghasiholi bagabagaNa. Amen!

PATAR DO HUASO-NA MANALUHON SIBOLIS

Lukas, 10:21

Laos di tingki i ma marolopolop Ibana di bagasan Tondi Parbadia, mandok : Hupuji Ho Amang, Tuhan sigomgom banua ginjang dohot tano on, ala ditamondinghon Ho i sian jolo ni angka na pistar dohot na marroha, gabe dipapatar Ho tu angka siondihononhon. Olo Amang, i do dihalomohon rohaM hian!

Aha do na mambahen las rohanta? Secara umum sude do halak marlas ni roha molo saut na sinangkpan ni rohana, sangon pandohan na mandok dapot na jinalahan, jumpang na niluluan. Alai suraksurak na balga jumpang hita i ma molo masa paraloan jala monang  hita diparaloan i. Ganup "kompetisi" sai adong do las ni roha molo dung dapot hamonangan. Songon i do las ni roha dohot olopolop ni angka sisean ni Tuhan Jesus, jala Ibana sandiri pe dohot marolopolop ala naung patar huaso dibagasan GoarNa manaluhon sibolis.

Dung mulak na sinuru ni Jesus angka siseanna na pitupulu i laho marbarita nauli, marbarita ma nasida dibagasan las ni roha ala naung tunduk dibahen nasida angka setan/sibolis. Alai didok Jesus do tu nasida,  unang ma ala ni na tunduk angka setan i tu nasida asa marlas ni roha. Ia las ni roha nasida na umbalga i ma ala tarsurat goar nasida di banua ginjang (10:20). Dohot do Jesus tutu marolopolop dibagasan Tondi Parbadia huhut dipuji AmaNa di banua ginjang, ala naung dipapatar tu angka siseanNa i huaso dohot hagogoon mangalo sibolis. Ditamondinghon do i sian jolo ni angka na pistar dohot na marroha.

Boasa didok ditamondingkon sian halak na pistar dohot na marroha? Hape hapistaran dohot hapantason marroha i do na jinalahan ni jolma di portibi on. Molo dung pistar, bisuk muse, nda i do dalan asa dapot hasangapon, hamoraon dohot hagabaeon? Tutu do, ringkot situtu hapistaran dohot hapantason ni roha i, alai naeng ma nian mardongan haserepon ni roha dohot pangoloion tu Debata. Na pistar dohot na bisuk ni tano on do dipangke sibolis i laho mangaliluhon portibi on, alai na metmet siondihononhon i do dipangke Tuhan Jesus manaluhon sibolis i. Jala i ma nuaeng las ni rohanta na umbalga, ala dilehon do tu hita huaso dohot hagogoonNa. Songon angka sisean i marlas ni roha hita tongtong ala dipargogoi Tuhan i hita laho mangadopi angka hamaolon na pinaro ni sibolis i laho manusai ngolunta. Amen.