Minggu, 16 Februari 2014

IDA MA, INGKON TULUS SANGKAP NI TUHAN I


Lukas 18 : 31
Alai diarahon ma na sampuludua i, ninna ma mandok nasida: Na nangkok ma hita tu Jerusalem jala tulus ma tu Anak ni jolma i sasudena, na tarsurat di angka panurirang i.
-ooo-
 Yesus memanggil kedua belas murid-Nya, lalu berkata kepada mereka: "Sekarang kita pergi ke Yerusalem dan segala sesuatu yang ditulis oleh para nabi mengenai Anak Manusia akan digenapi.
Manatap tu jolo manaili tu pudi, i do hata na arga di hata batak taringot tu partingkian. Manatap tu jolo i ma na naeng masa dope, so ise na umbotosa ia so holan Tuhan i.  Diboto Jesus do na naeng masa di joloNa : sitaonon, parungkilon (penderitaan) nunga paimahon hombar tu naung niaturhon ni Ama i. Manaili tu pudi i ma naung masa najolo, nunga dipabotohon hian di masa ni angka panurirang. Jala unokna sasintongna naeng mandok : Ingkon saut sangkap ni Debata Ama i marhite AnakNa Jesus Kristus.
Maol do diantusi angka sisean pangajarion ni Jesus taringot tu sitaonon sidalananNa. Nang pe naung leleng nasida rampak dohot Tuhan Jesus. Jala nunga godang dijalo nasida angka parsiajaran na arga marhite pangajarion dohot pambahenan ni Tuhan Jesus.  Alai tutu mapitung do nasida marnida di misi ni Tuhan Jesus ro tu portibi on. Ndang diantusi alai mabiar manungkun. Jadi diboto do mapitung nasida alai ndang olo mangido asa dibuha Jesus mata ni haporseaonnasida. Hape di udut ni ayat on  (ay.35-43) dipamalum Jesus do sahalak na mapitung. Ala diboto jala dihaporseai na mapitung i Jesus do Mesias Anak ni Debata, na marhuaso pamalumhon nasa sahit gabe dipangido ma asa dibuha matana sian na mapitung i. Saut ma tutu dipamalum jala dibuha matana. On ma na nidokna ia na marsimalolong ndang boi marnida (mapitung), hape ia na mapitung boi marnida. Ai sahat tu na diarahon Jesus angka sisean i nangkok tu Jerusalem ndang diboto nasida dope sangkap ni Debata Ama taringot Anak ni jolma i.
Nang hita pe olo do songon i. Nunga na sai jotjot hita manangihon hataNa, tu parmingguan, partangiangan mabege jamita, sandok targoar “na burju” ma hita mangihuthon Tuhan Jesus, hape olo do ndang taboto aha do lomo ni roha ni Tuhan i siulahononta. Ai na mapitung ma hita molo so taboto sangkap dohot lomo ni roha ni Tuhan i, nang pe sai ringgas mambege hataNa. Songon angka sisean i sai laon rap dohot Jesus alai ndang diantusi pambahenan ni Gurunasida i.
Nuaeng na patut siulahononta i ma asa tongtong tabuha mata ni haporseaonta mananda Tuhan i. Hamamatena do dalan manghophop dohot paluahon hita sian hamatean. MudarNa na durus i do na mamuri saluhut dosa pangalaosionta. Molo dung tangkas hita mangantusi dohot mananda pambahenan na arga dohot holong ni Tuhan  i tu hita marhite sitaonon, hamamateNa di hau pinarsilang dohot haheheonNa, gabe taboto huhut taulahon ma angka sangkap dohot lomo ni roha ni Tuhan i. Amen

TUBU PADUAHALIHON



Johannes 3:3
Dung i ninna Jesus ma mangalusi ibana: Na tutu situtu do na hudok on tu ho: Ia so tubu jolma sian ginjang, ndang tarbahensa marnida harajaon ni Debata!
-ooo-
Yesus menjawab, kata-Nya: "Aku berkata kepadamu, sesungguhnya jika seorang tidak dilahirkan kembali, ia tidak dapat melihat Kerajaan Allah."

Tubu Paduahalihon? On ma na solot di roha ni sahalak na margoar Nikodemus. Ibana sahalak Parise, na sangap, berpengaruh, pemimpin agama, na mauas di pangajarion ni Jesus. Nunga sai dipaihutihut ibana huroha angka na binahen ni Jesus tu jolma na torop, dibege jamita dohot diida angka halongangan angka na binahen ni Jesus i. Alani marsangaja ma ro ibana mandapothon Jesus bornginborngin asa manghatai langsung dohot Jesus. Disi ma dapotsa sada pangantusion na imbaru taringot tu pandohan tubu paduahalihon

Dimulana pandohan tubu paduahalihon dirimpu do tubu secara jasmani, sada hal naso mungkin be mulak tu bortian, tarlobi muse molo dung matua songon ibana. Pola do sala pangalapation ni si Nikodemus di hata pangajarion na sian Jesus taringot tu istilah tubu paduahalihon i. Hape na nidok ni Jesus tubu paduahalihon sian ginjang do, i ma na marhadomuan tu partondion. Ia so tubu jolma sian ginjang, ndang tarbahensa marnida harajaon ni Debata.

Boi do malo halak di parbinotoan, IQ-na timbo, alai maol mangantusi angka na bersifat partondion. I do umbahen na adong halak na gabe atheis (ndang porsea di Tuhan) ala ndang masuk angkalna angka pangajarion dohot pambahenan ni Debata. Alasanna ala abstrak do Tuhan i, karangan ni jolma sambing do i ninna.  Ujungna holip ma sian rohanasida hasintongan, ndang dirajumi nasida na adong do huaso di duru ni jolma i.

Songon i do nang pangajarion taringot tu na tubu paduahalihon, unang mintor tadok ajaran ni angka karismatik do i. Gabe mintor anti hita manghatai taringot tusi. Ndang boi tapangasahon pingkiranta dohot hadirionta laho mangatusi i, alai roha na rade jala ungkap songon si Nikodemus i do. Hatinya terbuka terhadap Firman Tuhan dan mengadakan percakapan pribadi dengan sang Firman, i ma Jesus. Laos diparjumpangan i ma ibana tubu paduahalihon jala tarbahensa marnida harajaon ni Debata.

Parjumpangan dohot parsaoranta na rosu dohot Tuhan Jesus marhite hataNa, jala mangido hagogoon ni Tondi Parbadia, i do na tuk mambahen hita tubu paduahalihon. Gabe imbaru ma hita di pangalaho, sikap, dipanghataion. Ndang be mangasahon gogo dohot pingkiran (songon angka na so martuhan i). Alai sepenuhnya pasahathon ngolu tu Tuhan Jesus. Asa molo di bagasan Kristus halak, na tinompa na imbaru ma i. Nunga salpu pangalaho na robi, gabe na imbaru (2 Kor.5:17). Amen

SIAN JAHOWA DO HANGOLUANTA

Psalm 118:17
Ndang tagamon mate ahu, sai na mangolu do ahu, asa hupajojor angka pambahen ni Jahowa.
-ooo-
Aku tidak akan mati, tetapi hidup, dan aku akan menceritakan perbuatan-perbuatan TUHAN.
 

Taingot do ra puisi na berjudul “Aku” karya Chairil Anwar (1943) isina mandok ”aku mau hidup seribu tahun lagi.” Sude do tutu halak mangidohon asa dilehon umur na ganjang, ndada holan si Chairil Anwar. Alai holan intap ni pitupulu taon do umur ni jolma margogo, lobi sian i hangaluton nama jambarna songon na nidok ni parpsalmen i. Alai tung dia ma nidokna 1000 taon, atik na karya dohot semangat ni puisi i do na nidokna? Boi do tutu halakna nunga almarhum alai goarna dohot karya ciptaanna sai diingot angka generasi na mangihut.

Di renungan sadari on, parpsalmen (David) mansarahon tu hita : ndang tagamon mate ahu. Aha do lapatan ni ndang tagamon mate ahu na nidok ni parpsalmen on? Dos do tu puisi “Aku” na di ginjang i? Ndang, marasing situtu do na nidokna. Ndang tagamaon mate ndada na mandok naso mandalani hamatean ibana, diboto parpsalmen do i. Haporseaonna na mandok timbul situtu do siamun ni Jahowa, siamun ni Jahowa do sibahen hamonangan (ay.16). Paralaoanna dompak angka musuna na gogo i, naeng mangago hosanna, ragam dibahen laho manaluhon ibana; alai parasi roha do Jahowa salelenglelengna di angka na marhaposan tu Ibana. Didok ibana do di ay.6 Jahowa do donganku, ndang mabiar ahu, tung aha ma tagamon bahenon ni jolma tu ahu? Ido asa pos rohana di ay. 17 i mandok : ndang tagamon mate ahu, sai na mangolu do ahu. Na marlapatan ma i naso jadi mate manang hahuaon ni musuna ibana. Asa dipajojor angka pambahenan ni Jahowa.

Ido tutu, molo taboan tu paraloan partondionta nuaeng, mansai gogo do portibi on marhite ulaula ni sibolis laho mamboan hita tu hamatean. Tuani ma ro Kristus, na mate jala tuat tu banua toru laho manaluhon huaso ni hamatean i sandiri; mate laho manghohop dosa ni hita jolma. Jala mulak mangolu salelenglelengna Ibana, asa manang ise pe na porsea di Tuhan Jesus naso hahuaon ni hamatean na paduahon i be.

Marhite i ma hita angka na porsea di Tuhan Jesus Kristus ndang jadi tahutan maralohon huaso ni hamatean, ndang tuk hahuaon ni portibi on be hita. Songon na nidok ni Ap. Paulus “jo hamatean didia hamonanganmi? jo hamatean, didia soropmi?” 1Kor.15:55. Nunga di hita hangoluan i, jala ngolunta on naeng bahenonta laho pasangaphon Tuhan i. Manghatindangkon marhite pajojorhon sude angka pambahenanNa di ngolunta. Ai ndada alani haburjuonta, alani na denggan na taula, ala ni jasanta na godang marhite amal umbahen na dipangolu hita. Tung holan ala ni asi ni rohaNa sambing do i saluhutna : ai ro di salelenglelengna do asi ni rohaNa (ay.1-4). Amen

MARSIHOHOT MIDA JAHOWA



1 Samuael 30 : 6
Jadi hagogotan situtu ma roha ni si Daud, ai ditahi situan na torop i naeng mandangguri ibana dohot batu ala gusar roha ni sandok natorop i, ganup ala ni angka anakna dohot boruna, alai marsihohot do anggo roha ni si Daud mida Jahowa, Debatana.
-ooo-
Dan Daud sangat terjepit, karena rakyat mengatakan hendak melempari dia dengan batu. Seluruh rakyat itu telah pedih hati, masing-masing karena anaknya laki-laki dan perempuan. Tetapi Daud menguatkan kepercayaannya kepada TUHAN, Allahnya.

Halak na mandele mansai maol do muse hehe (bangkit) molo masa kegagalan, talu, manang bangkrut usahana. Torop do halak na sukses di ngoluna dung jolo mengalami kegagalan. Isarana partani lasiak (cabe), di musim on mungkin ndang adong untungna, bahkan rugi total. Molo gabe tu pandelean do, ndang olo be ibana mangula manorushon usahana i. Alai halak na sai bersemangat, ndang gabe mambahen sumurut ibana mangulakhon marlasiak muse tu musim na mangihut. Asal di haburjuhon, harugian na parjolo i boi do muse sumuang, gariada sukses jala maruntung godang.

Songon na masa di turpuk sadari on, na hagogotan (ind. keadaan terjepit) do Raja David ala ro halak Amalek merampas huta Negeb dohot Ziklag huhut diboan sude pangisina gabe tawanan. Alani na masa i gabe ditahi situan na torop i naeng mandangguri ibana dohot batu ala gusar roha ni sandok natorop i, ganup ala ni angka anakna dohot boruna naung hona taban halak Amalek. Sada kegagalan do on di Raja David. Alai marsihohot do anggo roha ni si David mida Jahowa. Dung marpanungkun tu Jahowa, disuru ma ibana laho mangalele halak Amalek i mandok : “... Eahi ma nasida! Ai sai na dapot ho do nasida jala paluaonmu angka na tarboan i” (ay.8). Dungi dieahi si David ma tutu jala mulak muse diboan angka na tartaban i, laos dohot do na tartaban i ripe ni Raja David. Taida ma, umbahen na margogo pe si David mangeahi musuna ala na marsihohot do ibana tu Jahowa. Marpanungkun tu sangkap dohot lomo ni roha ni Jahowa ibana tongtong.

Songon i ma nang kunci keberhasilan ni halak Kristen, diajarhon do tu hita asa songon na binahen ni Raja David, i ma :
1.         Molo ro pe hagogotan (masa-masa sulit/situasi terjepit) sai tongtong ma marsihohot hita tu Tuhan i.
2.    Unang mintor mandele (putus asa) molo masa kegagalan di ngolunta. Tetap semangat jala optimis : Raphon Tuhan Jesus i pungka ulaonmu!
3.      Taingot ma hata on : “orang yang paling bangkrut di dunia ini adalah orang yang berputus asa”. Molo tubu dope hiras ni roha manang semangat na imbaru di ngolunta, boi do kegagalan i gabe marparbuehon keberhasilan. Amen!

Kamis, 16 Januari 2014

NANG PE MAOL ULAHON MA!

Lukas 6:27-28
Alai hudok ma tu hamuna na manangi: Haholongi hamu ma musumuna; na denggan ma bahen hamu tu na mangkosomi hamu. Pasupasu hamu ma angka na mamburai hamu, tangiangkon hamu ma angka na mangasupi hamu. 
-ooo-
(Tetapi kepada kamu, yang mendengarkan Aku, Aku berkata: Kasihilah musuhmu, berbuatlah baik kepada orang yang membenci kamu; mintalah berkat bagi orang yang mengutuk kamu; berdoalah bagi orang yang mencaci kamu)
Adong ma dua ripe na marhombar jabu, na sailaon sai marhosom do na sada ripe tu hombar jabuna i ala ni late. Sai dibahen ma garagara asa tubu bada. Di na sahali ro ma parhosom i dibungkus ma denggan sada "kado" dibagasan kotak jala dibahen ma di teras ni jabu ni hombar jabu na i. "Dari tetangga sebelah" ninna disurathon di kotakna i. Tontu longang do roha ni tetangga na burju i, "songon na burju ma hombar jabungkon" ninna rohana. 

Alai dung dibuha kotak i asing isina, hape (santabi) kotoran ni horbo do isina. Molo ala ni emosi nda patut ma rimas parjabu i? Nda penghinaan do na binahen na i? Ingkon marbada bolon nama ujungna, ala masalah harga diri do on. Jala ido pinangido ni hombarjabuna i. 

Hape aha ma na masa?

Dipauli inanta i do muse kue jala dibahen tu inganan na uli, disuru ma dipataru tu hombar jabuna i. Disurathon ma hata songon on: "Mauliate ma dihamuna, ala diparrohahon hamu do hape angka suansuanan na di jolo jabunami on na hurang napu. Anggiat ma napu nanilehonmuna i marguna laho palomakhon suansuanan i". Gabe maila sandiri ma parhosom i, ai na jat na niulana dibalos marhite ulaon na denggan.

I ma sada gombaran na boi tapatudos tu ayat sadari on na mandok : Haholongi hamu ma musumuna; na denggan ma bahen hamu tu na mangkosomi hamu. Pasupasu hamu ma angka na mamburai hamu, tangiangkon hamu ma angka na mangasupi hamu. Tontu ndada ulaon na mura on, songon mura ni na manghatahon. Porlu do adong hagiot na marsitutu laho mangulahonsa. Hape na jotjot masa, molo masa songon barita na di ginjang i sai adong do sidalianta mandok : "Ah, jolma dope iba, ndang surusuruan! Ise naso emosi molo dibahen songon i?" Ujungna ndang jumpang dame.

Sasintongna, sude hita, tuk do gogonta laho mangulahon Hata ni Tuhan i termasuk ma na manghaholongi musu, mangulahon na denggan tu na marhosom dompak hita, mamasumasu angka na mamurai hita, manang pinomat manangiangkon nasida. Ai ndang dipasahat Tuhan i tu hita ulaon naso tarulahon hita. Molo disuru mangulahon laos Ibana do na patauhon hita mangulahonsa. Asing ma molo so pangoloi hita di Ibana, manang boha pe gogonta dohot pingkiranta sandiri nama tapangasahon. Jala nunga taboto aha akibatna.

Antong dijou Tuhan i do hita nuaeng gabe sibaon dame, siboan pasupasu tu saluhut halak lumobi tu angka na manhosomi hita. Ndang adong rugi ni i molo tabahen na denggan tu halak. Gariada lehonon ni Tuhan i di hita las ni roha, sonang ngolunta, hipas roha nang pamatangta. Bereng ma angka parhosom i, angka na marsahit do rohana, jala na tuk pamalumhon i, i ma hata ni Debata. 

Alani i haholongi, pasupasu jala tangianghon ma donganmi dohot musum asa gabe halak na martua ho di ngolum.  Martua ma sibahen dame, ai goaron do nasida anak ni Debata (Mat.5:9). Amen.

HIRAS NI ROHA

Epesus 3:12 
Marhitehite Ibana dapot hita hiras ni roha dohot dalan masuk, di bagasan roha na pos, na mangkaporseai Ibana.
-ooo-
(Di dalam Dia kita beroleh keberanian dan jalan masuk kepada Allah dengan penuh kepercayaan oleh iman kita kepada-Nya.)


Sian dia do ro tubu hiras ni roha? Hiras ni roha manang semangat manang habaranion boi do tubu ala nionjar ni angka ubat, nionjar ni alkohol, nionjar ni ekstasi (isara ni pil anjing) dla. Alai tung habaranion naso denggan do i ala ndang sian "kesadaran penuh". Hea do binege sahalak parhalado ingkon jolo minum alkohol (tuak) asa barani jongjong maragenda, i ma habaranion na so denggan na mambahen parmingguon ndang badia. Ingkon sian kesadaran penuh do laho mangulahon ulaon di tonga ni huria i, habaranion i tajalo sian Tuhan marhitehite Tondi Parbadia.

I do nang panindangion ni Apostel Paulus di na ro ibana manongos suratna tu huria Epesus, hiras ni rohana manghatahon hata hasintongan (barita nauli) tu angka sipelebegu ala pangonjar ni gogo na sian Tondi ni Tuhan i (ay.5). Molo ingkon tarhurung jala manaon na porsuk pe ibana ala ni Kristus i dirajumi do dirina niihot (tawanan) ni Kristus disi. Alani do asa disosohon ibana : "Dibahen i mangido ahu, asa unang mandele hamu mida haporsuhonku, angka na humongkop hamu, ai hasangaponmuna do i." (ay.13).

Mansai godang do tutu tantangan niadopan ni Paulus di na marbarita nauli i. Molo so sian hiras ni roha na sian Tuhan i do ibana mangulahon parsuruon i olo ma mandele. Sian halak Kristen Jahudi mandok nasida do bangso na ditinodo ni Debata, marasing do nasida sian halak Kristen naso sian Jahudi. Hape angka naso sian Jahudi manang halak Gorik manghilala do nasida dapotan asi ni roha na khusus mangantusi parbinotoan taringot tu Debata. Gabe ro ma Apostel Paulus mangasahon Kristus mandok disi do tarida hahomion ni Debata na ingkon antusan ni saluhut bangso. Hahomion ni Kristus ndada ala maol diantusi jolma, manang holan angka elit rohani na mampu patoranghon, alai ala Kristus do hasintongan na na pinapatar ni Debata tu hita jolma. Jala Kristus i bersifat universal ndang adong be angka pangambat laho masuk tu Ibana. Sude bangso, suku (etnis) rap marsagihon teanteanan na dos manjalo asi ni roha ni Tuhan. Jala tarida ma i molo sada angka na porsea i.

 Tajalo ma hiras ni roha na sian Tuhan Jesus marhitehite Tondi Parbadia asa margogo jala dipatau hita marpanindangi tu saluhut jolma. Ai ulaon ni angka bangso, houm naung tarjou dibagasan hasadaon ni Kristus do ulaon barita nauli i. Tu ulaon na umbidang do hape hita disuru, i ma marpanindangi tu angka naso mananda Kristus. Torop do halak Kristen na mabiar mamaritahon Kristus di ngoluna. Isara ni molo mangan di lapo ni halak silom "martagiang dibagasan roha ma". Maila gabe siihuthon Kristus. Nda didok do: Asa na olo maila ala ni Ahu dohot ala ni angka hatangki, pailaon ni Anak ni jolma i do ibana, di na ro Ibana di bagasan hasangapon na di Ibana dohot na di Ama i raphon angka surusuruan na badia i (Luk.9:26)

Antong nunga dipapatar tu hita hahomion ni Kristus, marhite haporseaonta di Ibana, rap marhiras ni roha ma hita huhut dibagasan pos ni roha mamaritahon GoarNa. Amen



PILLIT MA HANGOLUAN I

5 Musa 30:19
Jouonku ma sadarion langit dohot tano gabe sitindangingku dompak hamu, paboa naung hupapillithon tu hamu hangoluan dohot hamatean, pasupasu dohot torutoru; dibahen i pillit ma hangoluan i, asa mangolu ho dohot pinomparmu sogot
-ooo-
Ulangan 30:19
Aku memanggil langit dan bumi menjadi saksi terhadap kamu pada hari ini: kepadamu kuperhadapkan kehidupan dan kematian, berkat dan kutuk. Pilihlah kehidupan, supaya engkau hidup, baik engkau maupun keturunanmu
Hea do jinaha sada artikel penelitian taringot tu dua ina dohot ngolu ni angka pinomparna. Ina na sada salahak na mambiar mida Jahowa, na sada nari sahalak atheis naso mananda Tuhan. Dung dipamanat angka pinomparna dapot ma sada kesimpulan na mambahen longang roha. Ia Ina na mangoloi jala mabiar mida Jahowa, na sai tongtong daulat rohana jala pagodanghon pinomparna mardongan tangiang, torop do pinomparna na gabe hasea, di pemerintahan, pejabat besar, musikus na tarbarita, pengusaha na sukses. Asing muse na masa tu pinompar ni ina naso mananda Tuhan. Sian torop pinomparna, umumna gabe angka parjahat, mavia, koruptor jala godang na hona penjara.

Nanidokna sian barita na di ginjang i, i ma ina na tarpasupasu dohot ina na hona torutoru/bura. Manginona do hape pasupasu dohot torutoru i sahat tu pinompar!

Tontu sude do hita mangidohon asa gabe halak na tarpasupasu ngolunta sahat tu pinomparta sogot. Lumobi ma halak Batak, marsiadu do manggulut pasupasu na diidentikhon tu hamoraon, hagabeon dohot hasangapon. Na mansai mambal di roha i ma sai naeng ngoluna tarpasupasu alai rohana holang sian Debata. Ingkon sadalan do pangoloionta tu Debata  asa dapot hita hangoluan dohot pasupasuNa. Molo soada do pangoloion, suhar sian i ma na dapot : uhum dohot torutoru.. 

Tuani do parasiroha Debata ni halak Israel umbahen naso siap nasida ala ni hatangkangon ni rohanasida. Dihalomohon Debata do hamubaon ni roha ni halak Israel. Jala marpadan do Debata ndada holan paulihon ngolu (pemulihan) dohot manesa dosanasida alai dohot do pasupasu na godang diparbaga. Ido nang turpuk sadari on na mandok  : "Ida ma, nunga hupapillithon tu ho sadarion hangoluan dohot hatuaon, hamatean dohot hamagoan. Ahu ma tutu mandokkon ho sadarion: Ingkon haholonganmu Jahowa, Debatam, jala marparange di angka dalanna, huhut mangaradoti angka patikna, angka aturanna dohot uhumna, asa pangoluonna ho jala patoroponna ho, jala pasupasuon ni Jahowa, Debatam ho di tano sitopotonmu nuaeng bahen partalianmu" (ay.15-16). Mura do sasintongna sipilliton i hangoluan manang hamatean, hatuaon manang hamagoan. Alai jotjot do Israel i gagal mamillit hangoluan dohot hatuaon i. 

Songon i do ra nang hita, satolop do hita mamillit hangoluan dohot hatuaon i. Alani asa dapot di hita hangoluan ingkon tama do hita : parjolo, manghaholongi Jahowa sian nasa roha, ateate dohot gogonta (pat. 5 Musa 6:4-5); paduahon, marparange di angka dalanNa; patoluhon, mangaradoti patik, aturan dohot uhumNa, i ma hataNa na badia i. Sotung be olo hita diela sibolis memillit hamagoan i. Molo dao rohanta na sailaon sian Debata, on ma tingkina marbalik mulak tu Ibana. Balga do asi ni rohaNa manjanghon halak angka na paubahon rohana. Dibahen i pillit ma hangoluan i, asa mangolu ho dohot pinomparmu sogot. Amen



Rabu, 15 Januari 2014

TANDA JALA HAPORSEAI MA JESUS

Johannes 1:1-3
Saluhutna i marhite sian Hata i do, umbahen na manjadi; jala ndang adong nanggo sada sian naung jadi i, na so marhite sian i. Di bagasan Hata i do hangoluan; laos hangoluan i do Panondang ni hajolmaon.
 -ooo-
(Segala sesuatu dijadikan oleh Dia dan tanpa Dia tidak ada suatu pun yang telah jadi dari segala yang telah dijadikan. Dalam Dia ada hidup dan hidup itu adalah terang manusia)

Ndang dung adong halak na  marnida Debata sian mata parduru (bd.1:18; 1 Joh.4:12). Alai boi do tahilala na adong Debata marhite HataNa, holongNa, dameNa, naso tarida ni simalolong alai boi margurasa di ngolu. Si Johannes patoranghon hadirion ni Debata sian sudut parbinotoan na tumimbo sian angka evangelium na asing (Mateus, Markus, Lukas).Sude na adong dohot na masa di tano on marmula sian Hata i do. Hata i do na mambahen manjadi, Hata i do hatiuron, Hata i do hangoluan. Hata (Firman, logos) i do Debata jala na gabe jolma. 

Sian Hata i do patuduhon hasolhoton ni Debata tu hita jolma. Sian Hata i  do saut sangkapNa di tano on tu angka natinompa, i ma marhite pangaramotion dohot haluaon pinaradeNa hian. Hata na nidok ni si Johannes i ma : Jesus.

Sudena i dipatorang si Johannes asa tangkas tatanda Tuhan i sibagasan ngolunta marhitehite Jesus Kristus. Ibana na do na manompa hita, mangaramoti na tinompana, huhut mamboan haluaon tu na tinompana i asa mangolu. Ibana do Panondang na mamboan hatiuron di ngolunta. Molo so dibagasan Jesus halak, haholomon manghuphupi ngolu ni jolma i. Sabalikna, molo tajangkon Panondang bolon i taruli hatiuron ma hita, las ni roha manggohi ngolunta.

Dung songon i panandaonta tu Jesus gabe porsea situtu ma hita di Ibana.

Sian panandaon na tangkas gabe porsea. Haporseaonta di Jesus Kristus mangonjar hita asa marpanindangi taringot tu goarNa dohot angka pambahenanNa. Dua do tugas ni halak Kristen dijoujou ni turpuk on : 1.Porsea situtu di Jesus Kristus do Tuhan na manompa, mangaramoti dohot paluahon hita; 2. Marpanindangi taringot tu Jesus ala Ibana do Panondang ni hajolmaon.

Ndang surusuruan di suru Debata marpanindangi taringot tu Ibana. Sude na mananda Ibana patut (wajib) gabe sitindangi ni Kristus so pola marimbar, nang pe pardosa hita. Antong tanda na porsea hita di Jesus Kristus, ingkon do (harus) tapatuduhon parange hatiuron i marhite ulaon na denggan. I do tujuan ni ngolunta. Amen






SANGKAP DOHOT LOMO NI ROHA

Jesaya 46:10
Ahu palumbahon hian sian mulamula ujungna sogot, ahu marboaboa sian na robi na so masa dope; laos ahu mandok: Sai hot do sangkaphu jala bahenonku ma nasa lomo ni rohangku
(Dari permulaan Kuberitahukan hal-hal yang kemudian, sejak dahulu Kuramalkan apa yang akan terjadi. Kata-Ku: Keputusan-Ku akan terlaksana, kehendak-Ku pasti Kulakukan!)

Saguru di lomo ni roha ni Debata do saluhutna. Ndang adong na malua sian naso pamotoanNa. Gari obuk na di simanjujungta nunga dibilang Debata (Mat.10:30). Di Ibana do bonana dohot ujungna! Ndang adong na boi tudosan bahenon tu Debata, na mangarajai saluhut pangisi ni tano on sian mulana dohot sian na robi.

Sude do hita mamparhatutuhon pandohan na di ginjang i, manang istilah na jotjot ta bege "mengaminkan". Taparhatutu do huaso, hagogoon dohot hamuliaon ni Jahowa di ngolunta. Holan i na gabe parsualan i ma patuduhon pangoloion tu na Marhuaso i. Jotjot do ndang taparhatutu hinagogo ni huaso ni Debata marhite angka pambahenanta na sai mangasahon pingkiran dohot marhaposan tu tano on.

Nuaeng, hata ni Debata paingothon hita sadari on mandok : Sai hot do sangkaphu jala bahenonku ma nasa lomo ni rohangKu. Somal do hita martangiang mandok sai saut ma lomo ni rohaM, songon na sai tasoarahon di tangiang hatopanta i, alai nda jotjot do tangiangta justru manuru, mamarenta bahkan mamaksa Debata?

Diboto Ibana do aha na ringkot di ngolunta, ai diparmudu do angka na tinompaNa i.

Haunduhon ni rohanta dohot pangoloionta sambing do na di halomohon Ibana. Didok Jahowa : "Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna" (Jer.29:11). Masa depan ni ngolunta mutlak do di tangan ni Jahowa, alani na patut ulahononta i ma :
1. Di sude partingkian tongtong ma tahatindangkon Goar ni Jahowa.
2. Mamparhatutuhon na hot do sangkap ni Jahowa salelenglelengna.
3. Tongtong marguru hita mananda lomo ni roha ni Jahowa.

Antong molo dung taboto sangkap ni Jahowa di ngolunta, i ma sangkap hasonangan; manang aha pe ulaonta, na tapingkiri, bahkan angka hamaolon na ro manahop hita, tapangasahon ma Ibana. Amen